《所羅門的偽證》應該係宮部美幸至今最長嘅小說，分成六冊，上網睇資料話有成180萬字咁多（！）小說由一宗校園發現學生屍體懸案開始，引發出一連串連鎖事件，一環扣一環，每一單事件，都代表住現今日本（其實全世界都通用）社會種種問題：校園欺凌、傳媒渲染、家庭疏離、校長為保校譽寧息事寧人、警方怕麻煩求其查案……絕對係社會派推理小說集大成嘅Masterpiece。
我誠意推薦每一個喜愛文字嘅朋友，嘗試閱讀《所羅門的偽證》，尤其香港人，讀完之後，你會感到好沉重，同時又有千愁萬緒嘅感慨：點解小說（我哋社會）入面有咁多廢柴成年人，唔去好好處理事情不突止，仲成日講大話，卻從來無諗過點去保護學生，當然報警更係嘥九氣。
學校，其實就係社會嘅縮影。成年人無論喺生活、工作等各方面都感到好無力，有人嘗試去改變，但最終敵唔過上層權力同壓力，失敗收場。久而久之，我哋個個都變成麥兜：算罷啦，唔好再搞咁多野啦。
不過，《所羅門的偽證》唔係一味沉重，宮部美幸寫咗咁多字，指出社會上種種問題，但佢最關心嘅，仍然係年青人。小說入面嘅成年人，完全唔識亦唔敢處理學生嘅問題，只識一味打壓、用謊言掩飾自己無能；小說開場死去嗰位學生，究竟係點死？同佢同班嘅同學唔想就咁就算，決定自己開法庭審判！呢個設定真係一絕，可謂對成年人世界種種偽善，作出最嚴厲嘅批判，同時亦帶出年青人被迫提早成長嘅唏噓！
感謝宮部美幸，佢對年青人嘅溫柔同表揚，值得我哋每一位成年人好好學習。黑心兼喪盡天良嘅人渣除外，因為佢哋已經無得救。
