前兩日見到Social Media介紹The Smiths經典金曲《How Soon Is Now?》，一下子腦海返番去舊陣時，回想起當日第一次聽到呢首歌曲嘅震撼。Johnny Marr張牙舞爪嘅電結他貫穿全曲，非常凌厲亦非常霸道，同Morrissey筆下自卑萬分嘅歌詞，形式強烈對比。
戲劇性反差，從來比平鋪直敍更吸引。因此，《How Soon Is Now?》雖然一開始只係B-Side歌曲（收錄喺1984年面世《William, It Was Really Nothing》細碟內），最終卻成為史密夫其中一首最佳作品，更曾多次入選乜乜百大搖滾金曲名單。近年老摩及老尊尼各自On Tour，仍會食老本繼續玩奏此曲，一起高呼British Rock Never Die。
當年《How Soon Is Now?》點解咁震撼人心？年輕時候嘅我哋，通常比較膚淺，覺得老摩嘅歌詞，完全講中每一位失敗者嘅心聲。「I am the son and the heir of a shyness that is criminally vulgar」。你睇老摩形容得我哋幾咁淒美？其實不過係一班落Club但唔敢溝女最終自己一個返屋企瞓覺嘅無能用者。某程度上，《How Soon Is Now?》同美圖秀秀無分別，同樣自欺欺人，簡稱自戀者。
當年嘅中二病失敗者，無乜渠道發泄；音樂、電影便成為我哋寄情所在。今天Social Media當道，任誰都可以上網發表任何意見，就算你唔識字，都識打字，語音輸入一樣OK。於是每個人日以繼夜出Po留言，發表真知灼見，以自己為世界中心，盡情鄙視身邊一切，將中二病發揮到淋漓盡致。
不過，唔係每個人好似老摩咁有墨水。你嘅文字，你嘅意見，轉眼便成為過眼雲煙，最終化作大數據Database一堆數字，方便Algorithm / A.I.分析，然後再派一大堆猜你喜歡嘅Mean爆內容，引導你繼續留言挑機、繼續發泄不滿、繼續自戀。所以今天，我哋已唔太需要另一首《How Soon Is Now?》。
