上世紀Britpop年代，唔少英倫樂隊大行其道，部份甚至成功反攻美國。不過多未必精，對我嚟講，嗰陣時好多樂隊、專輯同歌曲只停留喺好聽嘅階段，卻未到觸動嘅層次。可能因為大部份Britpop樂隊一係力sell自信爆棚，一係力圖美化傷感。無錯，佢哋就係差嗰一點點。不過當然有例外。
Shed Seven由一出道，已被歸納為Britpop樂隊，更有一個都幾核突嘅朵「Oasis Junior」。佢哋喺1994年推出嘅處男作《Change Giver》，算係一張水準尚可嘅專輯，但唔可以講好突出。惟入面有首歌《Mark》，有一段好The Smiths嘅歌詞：「Lover, I wanna swap you for another and another. We could mate, we'll make great lovers」，隱約預示樂隊日後重要取向。
1996年，Shed 7第二張專輯《A Maximum High》，係佢哋商業成就最高專輯；碟入面四首細碟全打入Single Chart Top 25，其中《Going for Gold》表現最佳排第8，亦係樂隊史上唯一一首Top 10細碟。呢首係一首好typical嘅Britpop歌曲，論流暢悅耳爽勁，的確唔差得過Oasis，末段Brass Section同電結他並駕齊驅演奏，係另一種觸動人心嘅感動。歌詞談及同朋友既遠且近嘅疏離感：「Time and time and time again, are you here for my pleasure? Or are you going for gold?」呢一份自省，同Oasis嘅自信，無疑係兩個世界嘅人。
音樂上，Shed 7亦突飛猛進，編曲豐富咗好多，電結他彈奏一時可以好「行」，一時又溫柔細膩。Shed 7嘅Paul Banks，絕對係Britpop年代被忽略嘅出色結他手。佢喺《A Maximum High》內嘅表現，簡單四個字形容：揮灑自如。呢方面真係有啲似The Smiths嘅Johnny Marr風格。
咁主音Rick Witter筆下歌詞，又似唔似Morrissey？我認為，佢文學修養唔及Moz，但佢哋兩個嘅歌詞，共通點都係充滿自省自卑自憐。唔同Moz / The Smiths，Shed 7比前輩多咗一份自大（唔係自信），用嚟掩飾佢哋嘅中二病。簡單一個例子，《Out by My Side》講毒男走去煩女神，明明對方唔理你，你仲夠膽死唱「How can you stay lock inside? You should be out as my bride」？似唔似《大時代》一幕，丁蟹俾玲姐拒絕後，佢隨即自圓其說，仲癲到話要同玲姐結婚？
Shed 7就係喺無窮自大背後，藏住無窮自卑，簡稱自欺欺人。呢份中心思想，亦同佢哋音樂風格perfect match。芸芸Britpop樂隊之中，我認為Shed 7係最能坦誠面對自己嘅一隊。
有冇搞錯？自欺欺人，都算坦誠？我認為係，因為咁樣亦係藝術表達手法一種。講返Oasis Junior呢個朵，Shed 7當年憑住《A Maximum High》嘅高水準表現，早已搣甩呢個核突稱號。當然佢哋嘅商業成就同Oasis相比，係蚊髀同牛髀，不過人比人比死人，最重要都係做返自己。講開Oasis嘅Noel Gallagher後嚟入唐寧街見首相，然後當無事發生，都係自欺欺人，但此等行徑，明顯並非藝術表達手法，而係搖滾叛徒所為。
