寫Saint Etienne嘅《Tiger Bay》，真係令我感到戰戰競競。聽咗呢隻碟超過25年、聽過無數無數次，我原來未寫過一隻字讚美佢，只因為佢實在太完美、太偉大喇，可能因為咁，我一直唔敢動筆。
《Tiger Bay》喺1994年面世，之前1991年，Primal Scream推出咗一張舉世公認嘅劃時代經典《Screamadelica》，碟入面包含多種曲風，非常折衷主義（eclecticism），喺搖滾音樂史上有舉足輕重地位。《Tiger Bay》同樣係一張折衷專輯，成員Bob Stanley講過，呢張碟嘅概念，係用電子跳舞風格製作現代民謠作品。
定咗呢個目標後，其他一切就清晰喇。
《Tiger Bay》全碟曲風包羅萬有，最Core嘅Folky元素，有翻唱傳統英國民謠嘅《Western Wind》；亦有將民謠《Silver Dagger》改編成強勁電子舞曲嘅《Like a Motorway》；佢哋自己原創嘅《Former Lover》，徹頭徹尾都係一首古典民謠。仲有結他彈到好似天上星星咁靚嘅Ballad《Marble Lions》、風馳電掣嘅《Urban Clearway》同《Cool Kids of Death》、樂隊最拿手嘅Indie Dance《Hug My Soul》、好有電影感嘅《Pale Movie》、Dubby純音樂《On The Shore》同《Tankerville》、古典嘅《The Boy Scouts of America》……每首歌曲抽出嚟獨立聽，都係咁獨一無二，充滿個性。不過當你順序由頭聽到尾，卻可以感受到歌與歌之間嘅連貫同一致，同樣精雕細啄靚到暈。
唔少音樂人或樂隊都試過創作折衷專輯，但老實講，好多都好難聽。唔係因為佢哋技術差錄音差製作差，而係純粹為折衷而折衷，以為樣樣曲風都涉獵到就好勁，卻往往落得大雜燴四不像嘅下場。正如兄弟爬山各自努力，唔係一個口號，得個嗌字，嗌之前都要先搞清楚大家目標係咪一致，唔係我有我行獅子山，你有你行鑽石山，出嚟結果自然得啖笑。
《Tiger Bay》係我心目中另一張完美專輯，它完美展現出Saint Etienne嘅音樂靈魂所在，亦即係樂隊眾人一直以嚟對唯美嘅追求同堅持。呢一點，佢哋直到今天都從來無改變過。
