過去一個星期發生乜嘢事？我一連寫了三篇悼念文章，呢篇係第三篇，悼念剛逝世嘅前Faithless主將Maxi Jazz。舊隊友Sister Bliss透過Twitter公告，Maxi上星期五晚已在家中安詳離去。
認識我嘅音樂朋友都知道，我好鍾意Trance，當時有香港DJ將佢翻譯為「殘思」，我覺得譯得幾有詩意。90年代時候，多謝《mcb》袁智聰、羔羊、林哲儀等作者嘅樂評介紹，我曾按文索驥購買大量Trance音樂聆聽，Faithless就係其中一隊。
當年有聽過Faithless處男作《Reverence》嘅樂迷，相信一定會同我一樣大表驚艷；碟中兩首細碟《Salva Mea》同《Insomnia》，毫無疑問已列入Trance史上經典金曲名單，亦係我嘅私人Trance Playlist必備曲目。喺強勁四拍四跳舞節拍下，Maxi嘅Rappin’吟唱冷靜而沉穩，如果抽出嚟單獨聆聽，其實極具詩意。呢個亦係Faithless嘅Trance舞曲如此與眾不同主要原因。就如Faithless兩位成員Rollo同Sister Bliss發表嘅悼文表示︰「 He (Maxi) gave proper meaning and message to our music」。
再講返《Reverence》專輯，經典之處在於唔單止Trance，仲包含Hip-Hop、Soul、Blues、Dream-Pop唔同音樂元素，成為音樂史上其中一張最出色嘅折衷性唱片，雖然我最鍾意都係佢哋嘅獨門Trance舞曲。後來一首《God Is A DJ》，相信係Faithless最為人知、亦係最經典一曲。歌名調轉嚟讀，就係DJ is a God。Maxi一開始便唱著「舞池係我嘅教堂，係我治癒傷痛之地。」跳舞音樂，或者音樂，從來都有療癒作用。感恩Maxi同Faithless寫咗咁多咁多出色作品。我會細聽返Maxi後來組成嘅樂隊Maxi Jazz & The E-Type Boys，聽講音樂風格集Rock、Funk、Reagge、Dub於一身，相信會幾精彩。Maxi同我一樣都係球迷，佢係水晶宮終身支持者；稍後一場水晶宮主場賽事，球隊會為Maxi進行悼念儀式。
