（主圖為當年DLLM隊照。Photo Source︰劉以達Facebook專頁）
早排寫「楊將軍之苦茶」，提及2位成員Eric Tam及Patrick Chan曾聯同劉以達組成DLLM。據達哥喺《方丈尋根記》透露，當年DLLM其中一個音樂路向係「堅持原創純音樂」。由上世紀80年代初嘅DLLM，到近日達哥推出3首新作NFT，一路走來，兜兜轉轉，原來達哥鍾情嘅，仍然係純音樂。
DLLM Era
DLLM時期嘅5首純音樂作品，幾年前已經可以喺Patrick Chan嘅個人Youtube Channel「318」聽得返。達哥形容DLLM樂風係Art Rock / Post Punk，我覺得偏向Art Rock較多，好似《Music #1》一開始的確幾Post-Punk，但樂曲一路推進，達哥同Patrick嘅雙結他彈奏十分唯美而低調，3個內歛青年，就用音樂去表達佢哋嘅情感。《Music #2》以簡陋電子節拍配上Jazzy結他，係一首好靚嘅純音樂。《Music #3 》Intro有啲似Japan嘅《The Experience Of Swimming》，音樂上彷佛預告日後楊將軍之苦茶嘅風格。《Music #4》更以Full-Band演奏，5首入面實驗味最濃，好有Krautrock色彩。唯一一首有歌名嘅《Neon》，應係佢哋最早期作品（1981年），粗糙嘅錄音技術，無礙三人盡情發揮隨心所欲嘅音樂才華，更帶點Free-Form功架呢。
Pre-Tat Ming Pair Era
DLLM解散後，達哥曾跟Simon Ho（後嚟嘅「午夜飛行」主腦）同Jan合組OEO（東方電子樂團），明顯向YMO致意，可惜至今OEO嘅作品仍然失傳。組成OEO前後，達哥同時參與一張《香港》合輯，收錄2首以佢個人名義發表嘅純音樂《紅衛兵》同《中國女孩》，無論歌名到編曲都散發濃濃中國風，為後嚟達明一派《石頭記》奠下基礎。個人認為呢2首作品明顯深受Japan《Tin Drum》時期樂風影響，達哥並非只係衣著造型模彷Japan主音David Sylvian；音樂上，大衛消費人更係佢嘅「靈感男神」。
Tat Ming Pair Era
進入達明一派年代，達哥正式挑戰主流，相對地較少創作純音樂，主要用作唱片Intro / Outro同Reprise，帶出專輯 / 樂曲概念。《石頭記》開場曲《離》，短短2分鐘內盡現達哥處理電子合成器功力，氣氛緊湊，將歌曲漸次推向高潮張力，亦同緊接嘅《馬路天使》銜接得天衣無縫。
同屬Reprise類別，《燦爛不再》將原本《今夜星光燦爛》嘅強勁跳舞節拍，轉化為一片荒涼死寂氛圍，同今日香港異常相似。《忘記她是他》延續《忘記他是她》末段長長音樂演奏，今天重溫，仍然難忘最後嗰段清脆鼓擊，一下一下打入心坎。《今天我願你平安，阿們》係《今天應該很高興》變奏，用嚟做達明最具政治意味嘅專輯《神經》開場，喻意不言自明。
廣義嚟睇，同樣加入人聲嘅《世紀末顏色》及《口》（1996年達明《萬歲萬歲萬萬歲！》重組時作品），都可列入本文主題範疇。《世紀末顏色》再同進念合作，耐人尋味嘅劇場唸白，配上達哥濃濃爵士味嘅音樂編排，屬達明異色作品。《口》由劉以達官立小學成員小美獻聲，但無歌詞；小美嘅演繹亦成為樂器一部份，帶出樂曲嗰份頹廢美感。
Post-Tat Ming Pair Era
達明一派第一次解散後，達哥組過幾隊樂隊，包括「劉以達與夢」、「劉以達官立小學」、「達與璐」；亦推出過《麻木》同《水底樂園》2張個人專輯。印象中呢幾隻碟無乜純音樂作品，唯有《水底樂園》同名曲，以水底聲效襯托達哥一手揮灑自如電結他彈奏，時而沉鬱時而荒涼時而心噏。仲有佢為獨立廠牌Sound Factory合輯《What's Sound Vol.1: Ma-Li-Ma-Li-Hung》貢獻一首《Face The Antagonism》，夾雜民族唱詠及古怪電子聲效，更有點點印度味，充滿實驗色彩。
同期達哥亦參與大量電影配樂，代表作包括同韋啟良合作嘅《誘僧》同《秋月》、二人同Virus合作嘅《醉生夢死之香港之虎》。據知以劉以達官立小學名義錄製嘅《三個受傷的警察》OST都非常出色，唯CD已絕版，暫時亦未有串流版本，甚為可惜。翻查資料，原來達哥事隔多年後，舊年再度擔任電影配樂（港產片《遺愛》），《IT狗》人氣女星陳漢娜領銜演出，有機會都想搵嚟睇睇，同時聽聽達哥嘅配樂「演出」。
Christian Music Era
再後嚟，達哥信奉基督教，發表過幾張福音大碟。其中一張《希望之旅》更包含多首純音樂，可惜同樣未有串流版；但網上搵到其中一首《你要救世界》，以二胡Solo開場，再漸轉入長長電結他Solo，令人聽得好滿足，完全係我喜愛嘅達哥Style。惟樂曲MV呈現一幕幕人類戰亂畫面，最後地球進入倒數，帶出達哥嘅反戰思想，唯有主能救世界。近日佢喺Facebook公開呼籲大眾關注戰亂、弱勢，絕非忽然大愛和平之舉，而係一路走嚟嘅堅定想法（記唔記得達明一派早年已有一首講戰爭嘅《亂》？）
The Time is Now: NFT Music
時間返番嚟2022年今天，達哥3首新作NFT《World's Dread》、《White Light》同《Lover》已可上網聽到，坊間已有唔少評論，達哥自己亦喺社交平台詳細解說3首作品嘅創作故事，我喺度無需再多講。只可以講，描寫戰亂嘅《World's Dread》（中文歌名《願世無憂》），就同昔日《你要救世界》相呼應；《White Light》令人聯想到達哥以往嘅中國風民族風；《Lover》就如昔日《口》，同將人聲成為樂器。一切都係一脈相承。
呢篇文章，嘗試將達哥40多年嚟創作嘅純音樂一次過討論，難免太浮光掠影，亦未算寫得太深入；當中可能有所遺漏及錯漏，歡迎提出補充及指正。驅使我寫呢篇文章最大原因，正正係達哥當年組成DLLM講過「堅持原創純音樂」。香港主流樂壇，純音樂從來唔受重視，或者因為「詞大於曲」概念實在太根深蒂固，「有曲無詞」自然不值一提。記憶中主流音樂人絕少推出純音樂專輯，我記得嘅有林海峰《Hardbeat Vol. 2- Bit, Bit…Bit, Bit》；2年前達哥參與一個純音樂Project《Guitar Calling》，翻玩佢當年寫俾譚詠麟嘅《刺客》變成Intrumental。專輯迴響唔算太大，但已係少數勇於嘗試嘅例子，值得嘉許。
Music Non-Stop
寫到最後，本文並非為純音樂平反，放諸全世界主流樂壇，純音樂都唔會成為主流，除非玩到好似Kenny G之流。我希望讀到最後嘅每一位，嘗試感受純音樂嘅好，無咗歌詞內容，音樂意境可以更遼闊，音符隨閣下心情而牽動。大家可試試由達哥嘅純音樂開始，或者喺串流平台自製一個「方丈純音樂尋根記」Playlist，透過純粹嘅樂器演奏，純粹地感受達哥多年嚟嘅音樂歷程，隨時有另一番體會。個人感受分享，我會為DLLM黯然解散感到可惜，佢哋嘅音樂才華，絕對值得擁有一張純音樂專輯去證明自己。未來達哥會否推出首張個人純音樂專輯，繼承當日DLLM未圓嘅音樂路向﹖樂觀期望，拭目以待。
