達明一派宣布再開演唱會，Replay《我等著你回來》同《你還愛我嗎？》兩張專輯。上星期寫完《我等著你回來》意猶未盡，一於寫埋《你還愛我嗎？》，一張奠下達明日後音樂創作取向嘅重要分水嶺專輯。
明哥多產，少琪減產
香港樂壇向來詞大於曲，一於先講講歌詞。以往達明專輯一向由陳少琪主力填詞，佢亦被喻為樂隊第三位成員。不過嚟到《你還愛我嗎？》，佢明顯減產，全碟9首作品只填咗3首，其餘就由老拍檔潘源良（3首）、邁克（2首）同何秀萍（1首）負責。
講完詞，輪到曲，黃耀明亦處男下海作咗2首半曲，包括點題作《你還愛我嗎？》、《血色薔薇》同《禁色》（後者同劉以達合寫）。就係由呢隻碟開始，明哥漸見積極參與創作（之前頂多同陳少琪合寫吓歌詞），到今日佢直情主導達明音樂；昔日幕後大腦達哥無可無不可志在參與彈彈結他，箇中轉變之大，大可另文詳談。
《半生緣》係《你還愛我嗎？》專輯第一首派台歌曲，再次沿用《石頭記》式中國電子風同玩疊字歌詞，但感覺無上次首《情探》咁倒模，可能因為邁克填得無咁古典而偏向新文學風格，同歌名取自張愛玲小說十分相襯，我認為呢首歌商業得嚟都不失坦誠，全曲濃得化不開嘅傷感，的確幾有張愛玲味道。
我唔愛你阿媽
第二主打《你還愛我嗎？》當年都幾Hit，明哥寫嘅旋律夠哂Catchy，潘源良嘅詞亦大玩政治隱喻，寫作手法其實同今年Hit爆嘅《係咁先啦》如出一轍，都係借此喻彼；仲有Beyond三子家駒家強阿Paul嘅搶耳和音加乘。不過我認為成首歌最重要係達哥充滿Reggae風嘅編曲，正式打破達明嘅電子樂隊框框，漸漸嘗試更多唔同可能性。唯一可惜係TBB拍攝嘅歌曲MV，故事場景內容竟完全抄足Air Supply嘅《Making Love Out Of Nothing At All》，明哥達哥聽咁多英文歌，點可以扮唔知唔提出反對嘅哈哈。
潘源良填嘅另外兩首《同黨》同《沒有張揚的命案》，前者無記錯應該無玩過Live，亦好少被提及，除因為音樂上平平無奇，政治味歌詞嫌寫得太白太Specific，卻隨年月而失去共鳴。而家再聽返「在昨日說為你建造／在這天率先爭取減輕債務／誰人若要舊價目每日請早」，唔係經歷過嗰個年代，又點知佢講乜？不過後面有段「在昨日說願一起擔當／在這天紛紛爭先飛奔遠岸／旁人事再沒有暇顧及一看」又俾潘生講中返，吹佢唔漲！相比之下，《沒有張揚的命案》無疑Timeless得多，歌曲主題非常簡單，就係再見理想，難怪深得成年人共鳴；尾段副歌大合唱編排既激昂又神傷，非常適合現場演出，帶動全場氣氛，難怪成為達明近年演唱會飲歌之一。
《禁色》敢做敢認
雖然陳少琪喺專輯入面嘅重要性大為減低，但由佢填嘅三首歌《禁色》、《你你我我》同《血色薔薇》都十分高質。《禁色》毋須再多講，喺嗰個「基佬＝愛滋病」年代，劉以達、黃耀明同陳少琪夠膽寫出一首高呼「愛本是無罪」、「願我到死未悔改」嘅同性戀歌曲，同時可延伸至各種非世俗接受嘅愛情，足以證明達明係先鋒。更夠膽係佢哋大方坦承《禁色》抄考自英國Art-Rock樂隊Japan《Nightporter》同電影《戰場上的聖誕快樂》主題曲《Foribben Colours》，敢做敢認，比起Mark Lui Carl Wong之流坦誠得多！
《你你我我》高質電子
《你你我我》係碟入面僅有兩首電子舞曲，另一首係開場曲《末世情》，但貴精不貴多。兩曲同樣描寫都市即食愛情，愛人換畫來去匆匆。雖然都係談情，卻絕非一般Canton-Pop式情情塔塔我失戀我空虛，取材放諸今天依然Valid，無疑係另一種Timeless。《末世情》更請嚟唱開情歌嘅陳慧嫻和唱，同一把聲線，帶嚟截然唔同感覺，有趣有趣。兩首歌嘅編曲亦盡見達哥處理電子合成器功力，好鍾意《末世情》非常有型嘅一段純音樂結尾；《你你我我》恍如兩大電子班霸New Order＋Pet Shop Boys混合體，電子音色游走喺Stereo兩邊喇叭焦焦焦，令人聽得非常過癮。
《血色薔薇》霓虹末世
《血色薔薇》印象中好少玩Live，但情況唔同《同黨》，《血色薔薇》係一首比較難玩現場嘅歌曲，開場噪動嘅電結他彈奏，已令人坐立不定，非常不安。配上陳少琪筆下描繪嘅末世降臨景象：「霓虹的幻象／日夜仍如常／但世間一切在變樣／變了樣」，就似呼應緊《今夜星光燦爛》嗰個「霓虹亮透晚上」嘅城市，終於由「一切在變樣」嘅進行式，嚟到今日「變了樣」嘅完結式。末段達哥更用上結他之神Robert Fripp嘅Frippertronics結他彈奏，老套但貼切地形容，確係勾勒出一片荒涼末世意境，同歌曲主題屬於同一世界，所謂曲詞編唱融為一體，《血色薔薇》就係最佳例子，期待達明到時嘅拉闊演繹。
仲有碟末作品《愛煞》，長長嘅氣氛化純音樂Intro，夾雜住男女做愛喘氣聲同各種環境聲效，至2分半鐘後明哥先登場開腔，不斷Loop住四四一十六個字嘅極簡歌詞旋律：「情迷意亂／露冷衾暖／浪語傾訴／無盡愛慕」，結尾嘅電結他彈奏又似向《Hotel California》致敬。今日Revist重溫呢一首《愛煞》，一啲都唔過時，而且比起現今好多歌曲前衛大膽得多。同樣嘅感覺，亦出現喺《你還愛我嗎？》多首作品入面，我認為呢隻碟比《我等著你回來》秤高少少，更加經典，更加長青，更加耐聽。
重頭重認，重新感受
《你還愛我嗎？》之後，同年年尾（1988年）達明推出佢哋可能繼《石頭記》之外最膾炙人口歌曲《今天應該很高興》，翌年《意難平》面世，陳少琪正式淡出，由周耀輝代替，音樂上亦漸漸遠離電子Oriented風格。《意難平》同繼後嘅《神經》，我都一樣好鍾意，但點解舊年達明Replay呢兩隻碟時候，我無寫文章Revisit重溫？今日諗返，可能因為呢兩隻碟太成熟太沉重，亦太完美，我反而更想重溫年輕時候嘅達明，會有較多菱角，但人大咗之後再聽返，會有更多感覺。Timeless嘅音樂，唔會隨年月而老去，反而能繼續賦予我哋更多唔同意義。多謝達明一派，多謝劉以達，多謝黃耀明，多謝陳少琪。
