10月1日係值得紀念嘅日子。10年前今天，台灣樂隊草莓救星同甜梅號曾聯乘推出細碟《這樣的我》，一首可能係史上最出色嘅後搖滾作品。
當年嘅我，從來無想過草莓救星同甜梅號，呢兩隊我第一及第二最愛嘅台灣樂隊，竟然會一齊合作，嗰份興奮而期待嘅感覺，至今我仍然清楚記得。
細碟B-side係重玩甜梅號《偏執狂的論文》，由兩隊樂隊重新編曲及演奏，理所當然加入草莓主音腊筆擔任和聲。但原諒我，當年我嘅所有焦點，全都放喺《這樣的我》身上。
曲、詞︰腊筆 編曲︰草莓救星、甜梅號
你喜歡 在昏黃房間裡有我的陪伴
我們都閉上眼睛不說話
只要分享心中發亮的月光
我喜歡 在茫茫人海中發現你尋找我的模樣
相信我從此不會再迷路
可以放下手中緊握的地圖
請牽著我的手 牽著我的手
靜靜牽著我 陪我到最後
請牽著我的手 牽著我的手
請牽著我的手 陪我到最後
謝謝你 喜歡這樣的我
《這樣的我》長逾11分鐘，係草莓救星同甜梅號野心之作，佢哋幾乎將Post-Rock / Slowcore所有最觸動人類嘅情緒都放進去，既有Godspeed You! Black Emperor / Mogwai嘅磅礡氣勢，同時滿帶Low / Galaxie 500嘅細密情感。多得腊筆嘅旋律歌詞，令歌曲比起嗰堆純為爆發嘅後搖滾樂曲，多咗一份人性化感情，好容易打入我心坎。
當年，草莓救星同甜梅號為《這樣的我》舉行過只此一次Live演出，兩隊一齊玩奏各自作品，更翻玩咗鄧麗君嘅《南海姑娘》。而現場版嘅《這樣的我》，由5支結他、2支低音結他、2套鼓、一部電子合成器，以及腊筆嘅歌聲（仲有昆蟲白及海棻嘅和音），組成無比巨大音牆，彷佛將人類所有悲歡哀樂嘅情感，一次過放進歌曲內，然後傾訴出來。《這樣的我》的確係一首無比溫柔嘅歌曲，如果我當晚喺現場，我一定聽到喊。
10年後，重聽《這樣的我》，有乜嘢感覺﹖咁樣講似乎唔太準確。呢10年嚟，其實我一直有聽呢首歌，咁多年嚟，已累積聽過幾多幾多次﹖《這樣的我》，其實就係草莓救星《太陽系》下集，當年嗰對決定喺埋一齊嘅戀人，經歷過10年歲月洗禮後，佢哋仍然並肩同行，更多咗一份感恩嘅心。10年嚟，呢個世界無變得更美好，荒謬事情每天上演，被現實壓迫到唞唔到氣，茫茫然唔知道應該點行落去。就好似行喺一條最漆黑嘅道路，前面會有分叉路嗎﹖我知道已返唔到轉頭，但應該揀邊一條路繼續行﹖
《這樣的我》，對我嚟講，亦係黃韻玲嘅《喜歡你現在的樣子》變調，而且將佢昇華。無論世界點變都好，最重要係，我哋仍能夠保持一顆純真嘅心，相信自己嘅信念、依照自己嘅感覺行事，唔輕言隨波逐流，而寧願自己一個濁水漂流。過程可能好痛苦、好孤獨，可能會覺得無人明白我；當然無人能完全明白了解我所有感受，但過程中，感恩有人同你一齊並肩同行，陪伴並相信你到最後。無論點怪異嘅人，都會搵到鍾意佢嘅人，令寂寞小公路上，唔再係咁寂寞。謝謝腊筆寫咗《這樣的我》呢首歌，謝謝你喜歡這樣的我。
《這樣的我》（2012）
