達明一派上星期公布再開演唱會，同上年「REPLAY神經 / 意難平」一樣，今次都係玩Replay，主角為《我等著你回來》同《你還愛我嗎？》。按呢個邏輯，如果出年繼續，應該會玩埋《石頭記》同《達明一派II》，唔知到時會唔會搵返方心美唱《夢竟成真》同《我是能源》呢？
經過呢一年，達明今次玩《我等著你回來》，時間真係好切合。當年呢隻碟正正回應八十年代移民潮，係一張比《石頭記》更完整嘅概念專輯，將老歌《我等著你回來》改編成開場《我等著…》同結尾《…你回來》，音樂夾雜住機場航班廣播，由一開始廣東話到最後普通話，一切隱喻不言而喻。
達明最商業化專輯？
不過當年呢隻碟反應一般，更被批評為重覆自己而變得商業化，部份論點我認為係Valid，例如幾首快歌《今夜星光燦爛》、《溜冰滾族》同《神奇女俠》音樂上近乎倒模；《情探》沿用《石頭記》電子中國風（又咁橋呢首歌嚟自電影《金燕子》，乃係當年《倩女幽魂》大賣後嘅Copycat跟風作）；《上路》歌詞又玩返《石頭記》式疉字……甚至有人話唱片封套都係抄Pet Shop Boys嘅《Disco》（的確有啲似）。
香港預言書
凡此種種，都令我以往對《我等著你回來》不以為然。後來人大咗，開始發現呢隻碟其實一啲都唔差，甚至有唔少神來之筆，為達明日後音樂路向奠下基礎。最佳例子無疑係《今夜星光燦爛》，完全係寫俾香港嘅最準確預言書，之後佢哋仲出咗個短短Reprise純音樂版《燦爛不再》，你話準唔準？《溜冰滾族》可能係香港史上第一批玩食字嘅創作；《神奇女俠》同樣係電影歌曲（甘國亮嘅《神奇兩女俠》主題曲），有Do姐鄭裕玲客串唸白（佢係電影女主角），歌詞亦間接預言今日TVB嘅沉淪：「不需要晚上追翡翠劇場，進展勉強」。至於潘源良填嘅《大亞灣之戀》，歌詞明刀明槍意內言外，算係達明正式第一首政治歌曲，之後越寫越多，多數都係由潘填詞，我記得當年有樂評將佢比喻為U2嘅Bono，為達明注入大量政治色彩。
文青燒信畫面靚
《我等著你回你》亦係何秀萍首度登場，佢填嘅《那個下午我在舊居燒信》無論歌名同歌詞，套用今日形容詞，係十分之文青，仲有少少矯揉造作，不過無論曲詞編仍屬佳作，音樂底有少少中樂、少少爵士，撞出嚟效果幾好；歌詞由Verse嘅文字堆砌到副歌嘅一瀉千里，結尾一句「看歲月燃燒」的確寫到個畫面好靚，我認為草蜢嘅《歲月燃燒》，就係順手借呢句歌詞寫成！
你望我望，誰看著誰
另一首更Jazz嘅《你望．我望》，記憶中好少玩Live，但絕對係達明滄海遺珠，歌曲捕捉咗舞會5分鐘情境，歌詞從男女主角你望我望嘅肢體語言到內心交戰描寫，都似係Real Time實時進行。最後有長近2分鐘純音樂演奏做結尾，似為舞會浪漫曖昧一幕留白，為聽者帶嚟無限思想（或暇想）空間。達哥一手隨心所欲電結他彈奏，既有濃濃爵士味，亦盡見佢揮灑自如功架。歌曲後嚟推出混音版《你望．我望之誰看著誰》，好可惜將末段結他Solo刪去，變為仿弦樂演奏；不過開首換上一段強勁Synth Drum Intro，又的確百聽不厭！
達明最傷感絕望專輯
最後想講埋《別等》，一首以電子合成器為主導嘅中版，記得當年自己最鍾意呢首，但後來達明佳作越嚟越多，慢慢對佢嘅感覺亦丟淡。今次Revisit重溫《我等著你回來》，我嘗試努力回想當日鍾意《別等》嘅原因，可能因為佢流暢而帶啲啲傷感嘅旋律？可能因為佢係碟入面最長一首歌？可能因為歌詞寫離別寫得好靚好有意境，尤其係頭兩句「望向極遠極遠東方染著紅的天，為了避免望你一張失意面」？我相信，今天Revisit重溫《別等》歌詞，唔少香港人都有另一番滋味在心頭：「別要別要問我可知有重逢一天，別要別要問我心中可掛念。」再聽埋《上路》嘅「天蒼蒼，今天各一方」、《情探》嘅「聚散一旦，遇劫分隔阻限」，以及《…你回來》明哥重覆唱住「還不回來，春光不再；還不回來，熱淚滿腮」……《我等著你回來》嘅B-Side，由《那個下午我在舊居燒信開始》到《…你回來》，完完全全將人類所有離愁別緒嘅感覺，投放並呈現喺呢5首作品入面。放諸今天，好多人離開之後，已有唔再返嚟嘅決心；留低嘅，亦知道佢哋呢份覺悟。然而自我別後，別要為我等候，但偏偏我仍等著你回來，幻想彼此仍在面前。
今天我終於知道，《我等著你回來》，係達明最傷感、最絕望嘅一張專輯。
