21年前，一隊嚟自英國伯明翰嘅電子樂隊Plone，曇花一現出過一張專輯《For Beginner Piano》，然後就消聲匿跡。但佢哋果種懷舊、趣致而溫暖嘅電子音樂同聲效，周不時都會出現我腦海入面，一直銘記喺心裡面。
從來無諗過，2020年4月今天，我竟可以聽到Plone全新專輯《Puzzlewood》！呢份感覺，實在係難以形容嘅激動同興奮，好似重遇21年無見嘅朋友一樣，個心不停噗噗跳，口裡有好多說話想講，但唔知由邊度講起好，只能以笑遮醜。
無見21年，Plone依舊別來無恙，新碟內玩奏嘅，依然係嗰種好analogue嘅電音。我係嗰種一聽到復古電子音效，就會馬上過電嘅人。呢一次，佢哋喺原有音樂基礎上，某啲曲目更多咗一份跳脫；仲有唔少靚到暈嘅慢板，我一啲都唔客氣，照單全收。
講起嚟慚愧，其實Plone消失呢21年來，我間中會諗起佢哋，但卻無乜點主動關注佢哋。當然樂隊唔係完全失蹤，眾成員曾組成或加入過其他樂隊，網上亦流傳佢哋一張未出過嘅非官方專輯，我不時攞出嚟止渴。今次我喺毫無心理準備下，迎接Plone回歸，固然令我興奮莫明意難平，但仲有一份「不勞而獲」嘅感覺――我完全無做過啲乜，Plone就回來喇。做人如果真係咁容易，守株真係可以待到兔仔，咁做人就輕省自在得多。只可惜，唔係呢。
雖然我唔太喜歡呢個詞語，但用「小確幸」嚟形容此刻心情，好似都幾貼切。寫完最後呢段，我有啲鄙視我自己哈哈哈！
