（24 Oct更新：感恩False Alarm / Teenage Riot阿靈將《吾持巴之》放上網，讓我終可一償多年未了心願，再次聽回呢首PixelToy最佳作品！）
今次【尋找香港純音樂系列】，名符其實想大家幫忙尋找一首純音樂作品，多年前我曾喺電台聽過，超勁超好聽，卻一直未有出版過；尋遍Google、Youtube、Bilibili……全部都無；但呢首樂曲，一直留喺我腦海裡，不時重播。
那是PixelToy嘅《吾持巴之》。
PixelToy，本地獨立樂圈出身，2001年組成。成員包括何山及Candy Woo，玩電子音樂為主，後來簽約明哥旗下人山人海廠牌，出過兩張專輯；2011年發表歌曲《異床同夢》後，未再有新作。
時間返番去2003年一個周六晚上，我乖乖留在家中，準時扭開收音機，收聽亞里安同阿松嘅商台《不設劃位》特備節目「維威喂巨星匯」，兩位主持以諷刺當年盛事「維港巨星匯」嚴重超支為名，請來一大班獨立歌手／樂隊做一首歌或Remix新版，在當晚節目中播放。PixelToy嘅《吾持巴之》，就係其中一首。
嚴格來說，《吾持巴之》唔算係100%純音樂。開場Intro已先聲奪人，用上彷Industrial打鐵節奏，但改以電子聲效呈現，搶耳之餘同時別樹一格。樂曲漸次推進，出現一小段Candy國語主唱段落，當以為佢會繼續唱下去之際，Vocal部份已火速完成任務，繼續彷如萬花筒般有趣電音演奏，結尾更Chemical Brothers上身，大玩刺激Synth加上類似色士風或Trumpet Solo（但變調走音）!
《吾持巴之》每個片段、每條Soundtrack看似不按章法，組合起來卻非常過癮好玩。唔敢說後來無者，但呢首作品，可能係我聽過最出色嘅香港電子樂曲！
其實，PixelToy後來在處女專輯《愛．科學》內曾有一首純音樂《一流》，可謂《吾持巴之》變奏版，採用了部份段落再重新編排，客觀來說唔算差，但感覺過份修飾及Overproduced，失去原曲《吾持巴之》嘅靈氣及玩味。
我對《吾持巴之》一直念念不忘，因為我對Indie年代嘅PixelToy同樣念念不忘。佢哋進入主流後，都係玩電子，同之前有何分別？我無《吾持巴之》原曲，唔能夠直接用佢嚟答你；不過網上搵到PixelToy夥拍獨立音樂人Oliver現場翻玩AMK《請讓我回家》，聽完之後，相信你會明白我嘅意思，究竟兩個年代嘅PixelToy，有何分別。
