（原文2003年於《mcb》刊登，現版本稍作修改，並改成粵文版本）
讀書時候，身邊師長都會告訴我們：「有書讀你就好好讀啦，第時出嚟社會做嘢，你就知呢個世界幾咁複雜。」校園肯定係溫室，可以輕狂，可以自閉，可以亂嚟，可以唔負責任，因為永遠有人願意原諒你。但當出嚟社會謀事後，就會明白人情世故之複雜，太多掣肘、太多妥協、太多束手無策。
校園比社會簡單、美好得多，好比夢想與現實。呢種說法，你認為係咪絕對性？
去年我曾介紹小白兔橘子唱片。去年呢家台北獨立唱片廠牌幫壞女兒同薄荷葉兩隊樂隊推出專輯，亦舉辦過一啲宣傳表演活動。小白兔擁有自家錄音室、自行印製嘅音樂通訊，以及自行設計嘅網站。特別一提係網站上仲設立一所「小白兔森林學校」，入面有貓頭鷹、女蛙、河童、浣熊等班級，歡迎任何人免費入讀。
「我係校長！仲未買Nipples專輯嘅小朋友請注意！你哋再唔買，學校就無錢要執笠啦！」
Nipples係邊個？Nipples係台北獨立樂隊，早喺1998年已組成，佢哋亦係小白兔橘子唱片創立者。Nipples女主音／低音手KK駐守小白兔唱片門市當售貨員；結他手小花成立NOIZ錄音室，3張小白兔橘子唱片發行嘅專輯，同樣喺度誕生。加上鼓手Gigga同新近入團的結他手小蘇（佢亦係台灣Downtempo樂隊78BPM結他手），現時Nipples係一隊四人樂隊。《James' Autumn》係佢哋嘅處女專輯。
成團5年，當中經歷多次人事變動，又要分神打理唱片店與唱片廠牌事宜。直至去年幫壞女兒灌製好《沒有毛的熊》後，Nipples開始全速製作自己嘅專輯。可惜過程一波三折，先是部份已完成嘅音樂檔案唔知點解無法開啟而必須重錄；鼓手因自身工作關係，要喺出差前最後一天錄好所有歌曲嘅鼓。千辛萬苦完成嘅母帶，喺今年年初送到CD工廠生產時又發生爆音問題，令推出日期一再推延，一切似乎係上天賜予Nipples嘅考驗。最後，《James' Autumn》總算能喺2月14日情人節順利面世，令人抹一額汗！
一拖再拖、等了又等，心情固然焦急，但無論怎樣都好，都不比上Nipples當事人心情。《James' Autumn》對佢哋嚟講，意義有多重大？我無法了解，作為旁觀者，我只能透過Nipples嘅音樂嘗試了解佢哋，點解會有Nipples？點解會有《James' Autumn》這張專輯？以至小白兔橘子唱片？
表面而言，《James' Autumn》係一張風格雜亂嘅專輯，粗略一聽，歌曲類型有Post-Rock、Math-Rock、Psychedelic、Noisenik、Grunge、Slowcore......似係Nipples吸取多種外國音樂風格，然後洐生出一張歸納新世代台灣獨立樂圈精神嘅指標性唱片。結他手小花也承認專輯有啲凌亂，但其實內裏10首曲目，已經係從Nipples五年來創作過數十首作品之中精挑出來，已經係最能代表佢哋音樂理念嘅歌曲。正如KK說，概念與曲風唔能夠混為一談。
細聽之下，發覺《James' Autumn》其實係一張好完整嘅專輯。先看歌名，《水餃》、《鰻魚飯團》、《小新》、《小河馬》、《Kitty貓》等等，都係好可愛嘅命名，同小白兔網頁與音樂通訊中嗰啲好低能嘅手繪公仔如出一轍，充滿童稚天真。
不過，Nipples嘅音樂處理一啲都唔可愛天真！小花一手深受Sonic Youth影響嘅電結他彈奏，令專輯處處流露著好直接、好Hardcore嘅不安。開場曲《明亮的心情》就係最好例子，一開始係機械重覆嘅後搖滾電結他和弦，到副歌變成爆炸性彈奏，主唱部仍同時放肆起來，爽快直接，毫不拖泥帶水。
更歇斯底里嘅有《自動販賣機》，配上KK失控演譯，不禁令我諗起The Breeders。短短分多鐘嘅《Kitty貓》，粗糙嘅音質原來係佢哋早期現場表演中用MD現場錄低，歌曲充滿原始Riot Grrrl樂風，跟歌名完全係兩個截然不同世界！
Nipples嘅音樂係如此此極端。撕開可愛糖衣後，全屬殘酷血淋淋現實。《鰻魚飯團》彷如行屍嘅死亡編曲，連KK都唱得毫無感情，末段失真結他確有Sonic Youth風範。《水餃》喺慢條斯理嘅緩飆編曲底下，循序漸進至狂野狀態，再回歸冷靜，如同另一首《花的小白兔》，從起初嘅甜美結他勾線，演變成後來強大電結他能量，結尾卻收得好靚。
溫柔與暴烈，整齊與狂亂。有時候Nipples亦可以表現得內歛而美麗。好像《小河馬》便係首典型嘅幽暗Slowcore作品。《小新》一曲層層疊疊嘅電結他彈奏，其實屬於動聽嘅英式Noise-Pop／Shoegazer模式。
歌詞方面大部分由KK負責，簡潔用詞卻充滿拼點色彩，內容留有大量空間俾聽者隨意聯想，如「水餃一朵一朵掛在天空／找尋過的什麼」，水餃究竟係乜嘢？每個人可能有唔同答案，相同係佢哋一樣掛喺你心中天空。
《自動販賣機》寫到「傷心的時候投個硬幣／就可以換回好心情」，以死物販賣機對之於人類活生生心情，很對立意味嘅物化比喻；《花的小白兔》更以側寫手法描繪愛情。
細味之下，你會發覺Nipples嘅歌詞真係好有趣，不過KK卻為此落註解：「Nipples嘅歌詞係一條鎖匙，你可以透過歌詞打開或鎖住我哋嘅音樂，但亦可以掉咗條鎖匙佢，或者唔理佢。」
從矛盾嘅對比中揭露生活嘅真相。無錯，真相係，成長往往係殘酷，回憶總會係美麗。問題係，現實真係咁複雜殘酷、令人沮喪？如果答案係「係」，咁我哋不如早死早著好過，做乜仲留喺世上苟且過活？正如KK同小花點解要建立小白兔橘子唱片？正如Nipples嘅專輯經過重重困難，點解最終仍能推出？
就算現實社會有幾複雜、有幾殘酷、有幾咁唔可愛、有幾咁束手無策，咁又點？
「未來仲係會錄專輯，錄音就好似說話一樣，我哋要講到牙齒鬆動口水乾晒為止。」KK說。
