遲嚟嘅2022年度名單。20022年，奇怪荒旦而感覺漫長一年。回想年初近乎封城兼人心惶惶，到年尾突然180度大翻騰，勁過Post-Rock、Grunge Rock嘅爆炸位。2023年會點？呢個問題，其實係問緊我自己。不過一定會繼續聽歌，Music non-stop techno-pop！
2022年心水專輯 / E.P.：
昆蟲白《瞬間》
「因為一言難盡，所以需要音樂。」昆蟲白嘅《瞬間》，應該係近年我聽過最坦誠嘅唱片，告訴我哋這些年來，佢嘅經歷同轉變。坦白講，當我首次聽到《More Love》正面得過猶嘅歌詞，總覺得怪怪哋，惟當日寫樂評時無寫出嚟。我只能明白，但唔會了解，但我仍感謝昆蟲白透過音樂，同我哋分享。
PVA《Blush》
近年最愛嘅英倫新進樂隊，玩奏刺激而帶實驗工業風嘅電子音樂。舊年樂隊發表處女專輯《Blush》，由頭電到落尾，電音處理非常「恆」，既冷酷又有型。PVA一出場，全部EDM要行埋一邊！
南洋派對《N.Y. (rmx) P.D.》
南洋派對2022年推出嘅同名專輯，可能係近年香港最勁最癲唱片；事隔兩年，樂隊舊年年初發表Remix大碟《N.Y. (rmx) P.D.》，請嚟多個本地音樂單位，將同名專輯內歌曲混音成電子跳舞版本，水準奇高，而且非常好跳，同外國Dance Music相比亦毫不失禮。唯一可惜係未有《18座》同《雞蟲狗公鴨》兩首名作嘅Remix！
南洋派對 ── 末世狂舞混音派對（香港電子音樂唔係垃圾！）
黃衍仁《窄路微塵》電影原聲大碟
實在太鍾意太鍾意《窄路微塵》，所以同時愛上電影原聲大碟，但並非愛屋及烏，由黃衍仁主嘅配樂，完全配合故事情節推進，風格亦跟電影同樣溫暖人心。就算單獨抽出嚟聆聽，都係好高水準嘅純音樂；主題曲《在路上》為電影寫上一個完美句號，既係總結，同時留有餘韻，讓觀眾／聽眾細意回味。
豆腐王國《Souvenir》
豆腐王國係我2022年開心驚喜大發現，佢哋玩奏近年大熱嘅Shoegaze / Dream-Pop曲風，但唔係一味炮製層層疊疊結他音牆，卻十分注意歌曲旋律撰寫。《Souvenir》一碟唔會過份吵耳，更能清晰感受得到豆腐王國嘅私密情感世界，一曲《The Mist》，寫出迷茫不知去向嘅心情，唔止年輕人獨有，人到中年同樣感受甚深！
Science Noodles《Noodles》
「科學麵」表面上玩Cutie-Pop / Bedroom Pop。《Noodles》一碟夾雜電子實驗元素，編曲乍聽簡單，但細聽可以聽到好多既過癮又有心思嘅元素。尤其鍾意佢哋Vocal處理，唔係Cutie-Pop嘅雞仔聲，而係更極致嘅蚊滋聲！期待2023年復常後， Science Noodles香港眾成員可同台灣成員晴子「合體」，帶嚟更多趣味與深度兼備嘅作品！
Merry Lamb Lamb《Genesis》
過去一年，本人正式對本地電子音樂完全改觀，除因為南洋派對一張《N.Y. (rmx) P.D.》，本地女電音唱作歌手Merry Lamb Lamb嘅處女專輯《Genesis》同樣重要。佢嗰種好九十年代初葉嘅流質電子曲風，處處令我回想起昔日聽英國Warp Label嘅美好回憶，配上Merry Lamb Lamb嘅雞仔聲，撞出嚟嘅效果非常不俗，無論唱英文、中文都毫無違和感，全因音樂底做得好！
Room307, Matt Force & Akira Mimasu《涼風有信》
滿帶濃濃爵士秋意嘅《涼風有信》，係舊年一張極高水準純音樂專輯。Room307放下Keyboard執起電結他、Matt Force唔唱Rappin’改為吹小號，既為樂迷帶嚟新鮮感，二人聯同鼓手Akira Mimasu嘅合作，亦成功帶出純音樂嘅魅力，只嫌樂曲有啲短，感覺意猶未盡。
聲子蟲《真面目》
聲子蟲舊年呢張復出專輯，係一張滿帶Typical後搖滾風格嘅作品，佢無乜驚天創新之處——的確，Post-Rock發展至今多年，基本上已玩唔出乜嘢花臣。但《真面目》令我再次重拾昔日聆聽Post-Rock嘅熱情，或者咁樣，已經好足夠喇。
法蘭《逞強的溫柔》
從來對台式流行情歌有一份獨特情感，就算後嚟我投進台灣獨立音樂懷抱，呢份情懷仍一直埋藏喺心底裡。聽住台灣獨立樂團法蘭黛主音法蘭呢張處女Solo作，正好讓我搵返呢份久違嘅感受。好難用短短文字交代，但我記得專輯推出時，有一段日子，我每日重覆又重覆地播住呢隻碟，好似一下子返番去八十年代末、九十年代初；但只要細心聆聽，法蘭嘅音樂懷舊之餘，仍保留住佢一直而嚟嘅Indie靈魂，呢個正正係法蘭厲害嘅地方！
Cicada《棲居在溪源之上》
舊年年初，Cicada復出推出細碟《棲居在溪源之上》，當時樂隊已預告會集資推出同名新專輯；經過大半年耐心等待，舊年年尾終收到佢哋呢張新碟，來不及放進CD機內細聽一次又一次，我已急不及待將佢列入年度名單之內。無錯，從來我都對Cicada有所偏愛！
The Lemon Ones《The Lemon Ones》
本地獨立樂隊The Lemon Ones係我2022年最後一個開心驚喜大發現。一次美麗嘅誤會，我聽到樂隊一首《Blind》，喜歡到不得了，令我再次有觸電感覺。當然，呢種感覺係好Personal。之後聽返佢哋嘅同名迷你專輯，6首Demo歌曲充斥住濃濃Retro Rock氣息，亦非常之Artic Monkeys。作為初出道作品，表現合格兼滿意有餘，期待2023年樂隊繼續有新搞作！
