（原文於2002年《mcb》刊登，現稍作修改，並改成粵文版本）
時間錯了。西班牙二人樂隊Mus第2張專輯《El Naval》，係一張屬於未來嘅唱片，當而家一切悲傷變成習以為常後，從口中輕柔唱出嘅Sadcore音樂。
喺《El Naval》10首曲目入面，女主音Monica Vacas與男成員Fran Gayo為聽者帶嚟一片蒼白嘅迷茫空間，寬闊得見唔到盡處。《Al Oeste De La Divisoria》與《Rencor》簡潔而不斷重覆嘅鋼琴和弦，就好似安魂曲一樣，教人安心合上眼睛熟睡，就算之後再唔會醒來，亦無所謂。
《Embalses Y Rios》與《Encofraos》細水長流嘅結他掃撥與晶瑩琴音，實實在在令我聯想起Damon & Naomi，同樣將濃濃傷感轉化為輕柔嘅淡淡然，漸漸分唔到美麗與哀愁，究竟有何分別。相比之下，我哋每個人呼天搶地嘅所謂不快樂，頓時覺得渺小無比。
Mus令我知道，原來悲傷，也可以分成唔同層次。如果《Cuesta》中嗰那狂亂嘅音樂編排，代表著人類時而失控嘅不由自主情緒，咁《Casi Ensin Zarrar Los Gueyos》以鍵琴演奏出一片無窮無盡嘅空間感，便代表著冷靜過後嘅想法，可能係追悔，可能係成長，但同樣束手無策。
有時候，人類嘅感覺實在很奇妙，當聽到專輯開場曲《Al Debalu》時候，從音樂、旋律，到神傷嘅小提琴拉奏，感覺好親切，好似曾喺邊度聽過，但最後仍搵唔到答案。或者呢首係一首屬於我嘅未來嘅歌曲吧，而現在嘅我，只係回到過去而已。
Mus嘅音樂，彷彿看穿人世間所有悲歡哀樂，欠缺一定人生練歷，斷難產生共鳴。所以我正努力學習年老，可以令我快啲返回未來。時間錯了，正如我和你。我哋都有太多話想講，但無講出口。無奈可比思憶永久。
