（原文刊登於2001年《mcb》，現稍作修訂，並改成粵文版本）
面對這個束手無策嘅世界，我常常抱有一個觀念，就係我哋人生路途上一切所遇所見，全部皆屬偶然，壓根兒唔到渺小嘅我哋選擇。但拿一面鏡子睇清楚，其實所謂偶然，無論係出奇不以然地令你驚喜，又或者只係普通不過嘅既定程序，一切一切都有追溯原因。偶然，就像被從前一件一件本屬無關痛癢嘅事情連鎖緊扣著，之後很自然地洐生出來。
《Life In Mono》、我喜愛Post-Rock、一個朋友、《音樂殖民地》（mcb）第180期、助聽器唱片店，當呢一堆人物事件串連起來，便構成我誤會地遇上、後來愛上Mono呢隊日本樂隊嘅原因。
好少聽日本嗰邊嘅音樂，認識亦好淺薄。對上一次，可能已係去年Damon & Noami同日本樂隊Ghost合作嘅大碟吧。但Mono的確教我眼前一亮，4位東京青年，玩奏嘅正係近年瘋狂愛上嘅Post-Rock音樂，而且更玩得非常出色，從第一次聽到佢哋處男大碟《Under The Pipal Tree》開場曲《Karelia (Opus 2)》時，我已如此認為。
嚴格嚟講，《Karelia (Opus 2)》一曲只用上Post-Rock嘅重覆和弦基本架構，嗰啲層層疊疊嘅失真電結他彈奏、嗰份低調噪音美學，再加上充滿節奏感嘅低音及鼓擊，Mono處處卻令我想起Shoegazer年代嘅動聽Noise-Pop；但係，係無旋律主唱嘅Noise-Pop。如果當年嘅Noise-Pop樂隊生存下來，佢哋而家嘅音樂，相信會同Mono呢首長達12分30秒嘅《Karelia (Opus 2)》差唔多。
除咗知道Mono嚟自日本東京，我對樂隊其他背景資料可說一無所知。為咗寫呢篇樂評，我上網搵到佢哋嘅官方網頁，知道《Under The Pipal Tree》經由John Zorn嘅唱片公司Tzadik作全球發行，不過樂隊組成同歷史等基本資料仍然欠奉，無所謂啦，也許保留一點神秘感更好，好讓我可以將心神專注放在Mono嘅音樂上，好純綷好直接嘅一次聆聽經驗，我喜歡呢一種感覺。
《Under The Pipal Tree》內散發著嘅，係好典型嘅Post-Rock / Noise Guitar / Slow-Core音樂氣息。唱片宣傳字句形容佢哋嘅音樂源自John Fahey、Sonic Youth、The Grateful Dead等，當中我只聽過Sonic Youth。講返唱片內一曲《The Kidnapper Bell》，經過前半部冗長氣氛營造之後，末段卻轉折成一段段張牙舞爪嘅失真電結他彈奏，的確甚有Sonic Youth風範，2位結他手Goto Takaakira同Yoda嘅技術實在不錯；但另外2位隊員，Tamaki一手玲瓏浮凸嘅跳脫低音彈奏，以及Takada Yasunori鼓花四濺嘅鼓擊，卻為Mono嘅長篇純音樂樂章提供源源不絕後勤節奏動力，好讓Goto Takaakira與Yoda二人可安心喺前方，盡情操控2支電結他所帶來無限嘅音樂能量。
《Jackie Says》與《Error #9》俱屬典型循序漸進式嘅Post-Rock樂曲，前者由沉鬱演變成一發不可收拾張力，再次令人陷入萬劫不復嘅深淵中；後者從溫婉前奏過渡至Ambient結他環境，再突然推演至由失真電結他交織而成嘅一片茫然空洞氣氛，呢一種類別音樂，我啉可能已喺其他無數Post-Rock樂隊嘅唱片中聽過唔少，但好奇怪，Post-Rock係一種好奇妙嘅音樂，初聽你會對佢嘅過份重覆性吃不消，但接受之後，你總會喺每首亦差不多曲式嘅後搖滾樂章中，找到各自不同嘅聆聽感受。我相信最大原因係，好多時候Post-Rock都無旋律無歌詞，一切純以音樂出發，隨意讓聽者心神領會。我聽Mogwai、聽Godspeed You! Black Emperor、聽甜梅號、聽Flowchart，以至聽Mono，都有唔同體會，佢哋係流著同一樣音樂血脈，卻由此擴散成唔同音樂情感。我越來越覺得，Post-Rock係一種真正打破地域界限嘅大同音樂。
無疑，現階段Mono嘅音樂駕馭能力，仍未能完全得心應手。從某些樂章片段中，可聽到佢哋嘅表現有啲刻意著跡及步履凌亂，但咁樣更凸顯Mono嗰份不顧一切嘅青澀本性，一份只屬於年輕樂隊嘅動人情操。試聽聽《Op Beach》，低緩嘅電結他與綿綿嘅低音，彷似有無窮無盡說話，溜到咀邊，但最後仍無講出嚟，係一首令人神傷嘅樂曲。
同樣傷感嘅《L'America》，來到中段，一股山雨欲來嘅氣勢正迫近之際，還以為可藉此抒發所有不安不快，Mono卻刻意將呢份爆發力硬生生地收回，讓所有不安不快一下子塞回心裡，最後仍要自己一個人承受，令人難以感覺淋漓痛快，但亦令呢首樂曲更形沉重。完場曲《Human Highway》同樣一脈相承，更要命係加入肝腸寸斷嘅大提琴伴奏，千言萬語嘅傷感，被重重電結他苦苦壓抑著，無限痛苦但美麗。
越聽著Mon呢張出色嘅《Under The Pipal Tree》，越令我感覺美妙沉醉，當然仲有一絲絲傷感……忽然想到，偶然地遇上Mono，這事情固然非我所能控制選擇，但既然我喜歡他們的音樂，其他一切早已沒有所謂。如果活著嘅意義就喺過程入面，何苦我哋仲要追究世上所有事情嘅洐生原因同終極意義呢？
我有位朋友，最近喺收音機聽返英倫二人組合Mono數年前一曲《Life In Mono》，發覺好鍾意好鍾意呢首淒美電子歌曲，亦讓我從幾近遺忘嘅記憶中，尋回Mono那溫暖流麗嘅電子音樂 ——《Life In Mono》、《Slimcea Girl》、《High Life》……所以當我見到《音樂殖民地》第180期助聽器唱片店嘅廣告入面，赫然發現Mono有一張喚作《Under The Pipal Tree》嘅唱片推出時，心想莫非係佢哋久休復出新作？嚟到助聽器，先知道係一場美麗嘅誤會，發表《Under The Pipal Tree》嘅Mono，原來係嚟自日本嘅Post-Rock樂隊，同英倫嗰隊Mono只係同名字而已，但好奇心驅使下，仍試聽唱片開場曲《Karelia (Opus 2)》......之後故事怎樣，讀完呢篇文章嘅你已知道吧！
