2022年世界盃終告落幕。作為英格蘭球迷，我當然會學足英式紳士風度，恭賀阿根廷奪冠，美斯亦喺生涯晚年一償心願，贏得球壇最高榮譽。佢從未失去信念，耐心等待，終於等到美好嘅呢一日到來。
今場決賽的確精彩，阿根廷同法國踢到加時兼互射12碼先能夠分高下，但其實賽事要到安巴比下半場末段射入12碼追近1:2後先正式開始；此前，法國唔單止先失兩球，形勢上更盡失控球兼零射門，完全捱打狀態，毫無衛冕隊架勢。但點估到安巴比一不離二、最終二不離三，大演帽子戲法為球隊兩度追平？如今只差一點點即可成功衛冕，總算保住法國隊嘅尊嚴。
至於阿根廷同美斯……相信唔使筆者多講。呢一日，佢哋已成為全世界最Hit嘅流量密碼，網絡上會出現無數讚美球王嘅文章 / 圖片 / 短片。正所謂多我呢一篇唔算多，少我呢一篇唔算少，但我仍為美斯感到高興。文首一段送俾佢嘅苦盡甘來祝賀，取自80年代英倫經典樂隊The Smiths主音Morrissey嘅個人作品《I Know It’s Gonna Happen Someday》︰「Please wait, don’t lose faith, I know it’s gonna happen someday to you……」（收錄喺老摩《Your Arsenal》專輯內。）
如果細心留意，Morrissey呢首歌歌詞，重點係 「To You」兩個字 ── 老摩樂觀地鼓勵並相信，美好一天終會降臨「你」身上 ── 背後嘅潛台詞，就係美好嘅一天永遠都唔會降臨「我」身上。究竟呢首係一首樂觀嘅歌，定係悲觀嘅歌？對英格蘭球迷如我，就當係苦中作樂、為人哋高興吧。我哋早已習慣。
但如果另一球王基斯坦奴朗拿度聽到呢首歌，佢隨時會嬲到掟爛唱機喇叭！
（原文2022年12月19日喺NowSports網站上載，現稍作修改，並改成粵文版本）
