（原文刊登喺2003年《mcb》，現版本稍作修訂，並改成粵文）
非典型肺炎（沙士）疫情已漸退，我哋都應該慶幸香港總算熬過一段低潮時候，但，我哋人生嘅低潮呢？
每次聽見蘇格蘭二人組合Arab Strap，我都會聯想到低潮、頹廢呢啲負面字眼。由1996年組成至今，Arab Strap嘅音樂歷程變化唔算好大，佢哋從來都唔屬於行喺最前頭嘅先鋒樂隊，一直安份守己，又或者你可以話係自我沉溺地玩奏住一啲卑微嘅低調音樂。Arab Strap從來唔算偉大，但，呢個世界上又有幾多人唔係卑微渺小呢？
《Monday At The Hug & Pint》已經係Arab Strap第五張專輯。Hug & Pint係樂隊出身地蘇格蘭Falkirk市內一家酒吧，佢哋曾經常常喺度演出。同初出道時比較，無疑Arab Strap嘅音樂已越嚟越美化豐富，好似《Who Named The Days》、《Loch Leven》、《Act Of War》呢幾首新作，配上大量弦樂演奏，哀怨傷感，我仲以為聽緊Tindersticks；《Fucking Little Bastards》充斥住強大電子鼓機節拍，再以暴烈電結他同華麗弦樂作梅花間竹編排，組成一首扣人心弦嘅Epic作品；對照組係《Meanwhile, At The Bar, A Drunkard Muses》，全曲回歸基本，只有Malcolm Middleton一手動聽結他彈奏，以及Aidan Moffat嘅低沉聲線伴唱。
如果你仍然迷戀昔日Arab Strap嗰種以電子鼓機配合唯美結他嘅招牌曲風，單聽專輯入面《The Shy Retirer》、《Peep-Peep》、《Glue》同《Serenade》，相信已能令你滿意收貨。當然，呢批新歌更加旋律化，Aidan亦唔再好似從前咁獨沽一味喃喃吟唱。人嘅外貌外表會隨年月改變，但骨子裡本性唔會咁容易。Aidan筆下歌詞，依舊係關於性愛、愛、人性、疏離、頹廢生活；描寫依舊暴烈、下賤、粗糙、卑微。每次讀佢嘅歌詞，心情總會無比興奮，道理就如從黑暗中看見光明。而身處喺光明嘅人，往往因為四周太明亮，以致睇唔清方向。就好似《The Shy Retirer》其中一段歌詞咁寫：「How do you know you've ever really loved? But when I feel like this, I know it doesn't matter」。低潮係人生嘅磨練。所以我喺度諗，就算人生永遠活喺低潮，都無所謂啊！
