Kings Of Convenience闊別多年終於回歸，推出新歌《》，音樂一響起，魔法就出現：熟悉嘅木結他和弦、靚靚嘅小提琴前奏，當然仲有靚仔Eirik Glambek Bøe同四眼仔Erlend Øye零瑕疵嘅Harmony雙主唱，一下子將時間停落嚟，然後帶我哋呢班昔日年輕但今日已變中佬中女嘅樂迷，返去20年前初聽《Quiet Is The New Loud》嘅美好青春時光。
無錯，當年方便之王的確幾多女Fans，就連本身唔聽英文歌嘅朋友，都會對佢哋嘅新世紀Folk-Pop十分受落，挪威Simon & Garfunkel外號絕非浪得虛名。佢哋的確好Pop，但又唔可以否認好好聽，錄音又非常高水準，能夠喺流行之中保留獨立自主氣質，其實好難得，亦成為當年New Acoustic Movement中最突出一員。
同其他潮流一樣，呢個Movement隨時間而消散，2009年方便之王推出過第3張專輯《Declaration Of Dependence》後亦再無新作。今次等咗足足12年而嚟的回歸，消息一出，自然令一眾中佬中女樂迷熱切期待，紛紛表示「餓」咗佢哋嘅歌很久。呢12年嚟，四眼仔Erlend一直有玩音樂（Whitest Boy Alive同自己嘅Solo），靚仔Eirik相對較靜；但其實佢哋無我地想像中分開咁耐。四眼仔透露早喺2016年，佢同Eirik早已寫咗啲新歌，但水準唔太滿意，便將佢哋擱置一旁。然之後，再次係Leslie Feist出現 ── 你無記錯，就係當日喺《Riot On An Empty Street》入面客串寫歌同獻唱嘅Feist。「因為佢有份參與，我同Eirik都想做到最好！」原來Feist就係佢哋嘅靈感女神！
就係咁，方便之王終於返來喇。新專輯《Peace or Love》下月就會推出，碟名亦係一個引人思考嘅命題：和平或愛，唔係愛與和平。兩者若只能取其一，你會點揀？12年後，四眼仔同Eirik外貌已顯得有啲老態，《Rocky Trail》嘅歌詞亦帶有歷經滄桑後嘅體會，可幸仍然保存希望，咁樣我哋先有力量繼續活下去。好鍾意歌曲尾段長近1分鐘嘅純音樂演奏，係好簡單但好動聽嘅Acoustic Guitar Solo處理，一路聽住，真係好想佢繼續唔停演奏落去；但如果真係唔會停落嚟，我哋又點能夠期待《Peace or Love》面世呢？和平或愛，A or B，確係只能二揀一。如果和平只係自欺欺人嘅表面裝飾，我哋寧願不惜一切、攀山涉水都要搵到我哋想要嘅愛。無論時間要幾耐，都值得我哋靜靜去做。
（原文2021年5月5日喺「紳吟」Facebook上載）
