（原文刊登於2002年《mcb》，現稍作修改，並改成粵文版本）
最近各位樂迷一定心情雀躍萬分，因為後搖滾兩大紅人 —— Sigur Rios及本文主角Godspeed You! Black Emperor，最近不約而同推出新作，一場「Post-Rock之戰」即將上演，情況好比當年另一個世界Oasis VS Blur的Britpop大戰一樣激烈。
細心嘅讀者可能會發現，筆者寫錯咗樂隊名字，但其實我無。今次回歸，「神速黑皇帝」將樂隊名字中嘅感嘆號由最後移到中間，再唔係Godspeed You Black Emperor!，而係Godspeed You! Black Emperor。原因？無從稽考。我哋都知道GY!BE從來行為乖張，加上今次專輯推出非常突然，事前無太多相關消息發放，就好似Sigur Rios新出嘅無題專輯一樣，行事變得更低調及耐人尋味。或者人紅之後，就會係咁。
總覺得近年GY!BE已被人擺上Post-Rock界神檯，令人有一種「唔聽GY!BE，點同人講話自己識Post-Rock」嘅厭惡感覺。畢竟好多時候，兩個世界嘅事情都好相似。因為已成名，越嚟越多人對GY!BE嗤之以鼻，認為佢哋只係被過份吹捧，其實都唔係好勁啫。
事情真係咁？筆者從來都係擁GY!BE一派，最近同美國後搖滾新貴Explosions In The Sky結他手Mark Smith談起GY!BE，佢話說自己不算好鍾意佢哋，但不容否認佢哋對新一代起有好重大影響力。Mark話現時美加一帶嘅年輕人想「夾Band」玩音樂時，好多都以GY!BE做模仿學習對象，情形好似昔日Sonic Youth同Nirvana一樣。GY!BE果然無改錯名字，佢哋已升格為神明，受萬人敬仰。佢哋一言一行，將會影響日後無數人和音樂。雖然，神明通常都係身不由己。
因為身不由己，自從2年前經典專輯《Lift Your Skinny Fists Like Athena To Heaven》帶嚟極度好評及成就後，一眾隊員卻暫時放下GY!BE名義，努力發展各自嘅分支樂隊，可惜水準參差不齊。其中筆者最鍾意「有旋律有主唱」嘅HRSTA；1-Speed Bike卻嫌太普通太習作；Set Fire To Flames及A Silver Mt. Zion都唔錯，但氣勢鋪排仍未及GY!BE。對我嚟講，以上分支樂隊只能暫時止渴，或者呢2年來我所等待嘅，都係GY!BE新作。
其實音樂本身並無所謂錯錯對對，只係我哋混雜很多人為看法意見後，先令事情變複雜。回歸最基本，撇除所有成見藩籬，嘗試再去聽GY!BE，然後撫心問自己，佢哋嘅音樂，感唔感動到你？只要答案係「係」，其他一切都唔再重要。
所以GY!BE再次走埋一齊。新專輯《Yanqui U.X.O.》搵嚟著名音樂人Steve Albini負責錄音，此君去年同Mogwai監製嘅細碟《My Father, My King》，可以話係另一經典，莫非佢將會成為Post-Rock界另一幕後紅人？講返《Yanqui U.X.O》，從封套以至內頁設計，再次帶出GY!BE對戰爭與和平嘅關注，但一切可能有關嘅信息，只能喺Artwork中搵到較明確嘅蛛絲馬跡（今次出現戰鬥機及大量炸彈）；音樂上就較模糊，因為新專輯係GY!BE首次無混入人聲 / 說話 / 演講喺樂章中，令一切只能意會。
或者咁樣更好。《Yanqui U.X.O.》可能係GY!BE有史以嚟最純粹直接嘅專輯。由兩部分組成嘅《09-15-00》，第一部分長達16分鐘，由開首以電結他及小提琴勾劃出一片沉寂孤零，漸漸地聲音開始明確響亮，當以為高潮即將來臨之際，卻又硬生生停落嚟，然後再醞釀，最終，都係回到我哋熟悉嘅GY!BE嘅澎湃氣氛營造，狂亂而多重嘅電結他彈奏、傷感不安嘅弦樂編排，仲有軍鼓嘅強力節奏，完完全全屬獨一無二嘅GY!BE式樂章，而且比以往更具旋律感及高潮迭起，相信稍後會抽出嚟做細碟。
緊接嘅《09-15-00》第二部份，彷彿係前曲餘韻，由最高潮滑落至最低點，短短6分多種荒涼意境，仿如人生最低潮，亦蘊藏無限傷感。詩人何雪雲嘅《你眼裡的悲傷》，會係呢段樂章最貼切形容：「你眼裡的悲傷，薄霧一樣輕涼，蓋在眼眶之中，淚意汪洋。你眼裡的悲傷，細水一樣悠長，流進空氣之中，四散飄揚。」
唔少人覺得GY!BE嘅樂章太冗長，又太重電影配樂味道，起初我都係咁認為。但再細心聆聽後，卻發現更似一首首後搖滾古典樂章。高低起伏嘅鋪排、段落之間嘅構造，皆配合得絲絲入扣，雖然刻意著跡，卻不得不佩服佢哋嘅音樂造詣，將搖滾樂提升至古典音樂層次。同樣超過20分鐘嘅《Rockets Fall On Rock Falls》及《Motherfucker=Redeemer》第一部分，兩曲都係最佳例子。前者最特別在充滿金屬味電結他彈奏，充滿空洞感，結尾亦不忘嚟一段短小靜態Reprise；後者一開始透過急速節拍，令爆炸式高潮好快地，逐步逐步推進迫近，以致一發不可收拾。於是高潮喺中段已完結，餘下10分鐘平靜。
《Motherfucker=Redeemer》第二部分同第一部分有乜嘢關連？對我而言，佢更似一首獨立樂章，一首描繪我內心世界嘅樂章。我從來都唔理GY!BE音樂中意圖表達嘅沉重信息，我只關心我自己。《Motherfucker=Redeemer》第二部分，連綿嘅低音及重覆嘅鼓擊節拍，就係我嘅表面。而背後層層疊疊嘅電結他，就係寂靜中嘅暴風，等待一刻爆發。當低音及節拍越急激，背後嘅電結他便越繁亂，卻始終去路無從。
正如如何堅強嘅人，心裡總有佢嘅秘密想同其他人分享。如果唔能夠分享，惟有沉醉喺音樂當中，尋找類似情感認同。我開始明白，點解我會鍾意Post-Rock。實在好希望，終有機會親身睇到GY!BE嘅現場演出，或者到嗰個時候，我嘅情緒先能夠完完整整宣洩出來。而家嘅我，只不過係喺度自欺欺人。
Godspeed You! Black Emperor嘅《Yanqui U.X.O.》，同步喺另一個世界推出，Constellation發行。
