究竟Post-Rock係一種咩嘅音樂？我點解會鍾意Post-Rock？
當年一開始聽外國音樂，慢慢會發現，身邊總有一、兩個同路人，通常為數唔多，但總會有。無論佢哋聽邊種類型音樂都好，大部份人，包括我自己，都有一個共通點，每當情緒低落時，心裡總會同自己講：「好唔開心啊，要聽Joy Division啊！」
所有聽英文歌嘅樂迷都知道，Joy Division已被升上神檯，所有低調死亡不快，全都同佢哋有關。後來我發現，原來有一隊比Joy Division更加之低調死亡不快嘅樂隊，令當時自命生活不如意 （簡稱中二病）嘅我，不禁重拾點點人生樂趣。
我所講嘅，就係鼎鼎大名嘅後搖滾班霸Godspeed You! Black Emperor。當年第一次聽佢哋，就係呢張後搖滾史上其中一張重要專輯《Lift Your Skinny Fists Like Antennas to Heaven》。
呢張專輯，可以講將我以前聽過嘅所有低調、死亡、不快、不安、無助、絕望、悲憤、孤寂（使唔使咁多形容詞）嘅音樂元素結集一起，化為一首首末世長篇樂章。雖然Godspeed嘅音樂無旋律歌詞，訊息亦只係透過零碎嘅街頭演說同隨意嘅錄音片段傳達。但佢哋由3位結他手、2位鼓手、2位提琴手等交織出嚟嘅高潮迭起、隨時超過20分鐘長嘅後搖滾交響樂曲，比好多有曲詞唱嘅音樂，嚟得更清晰、更具感染力。因為Godspeed將一切重歸音樂本身，無任何假意矯揉嘅虛飾，全部都係發自內心嘅血肉情感演奏。
具體嚟講，Godspeed嘅長篇樂章，往往分為多個段落。你聽到嘅，可能係一段不安嘅街頭演說、可能係一片Ambient聲效、可能係由小提琴發出嘅哀怨悲鳴、可能係由結他勾出嘅荒涼意境……重覆又重覆，卻隨時漸變為瘋狂凌亂嘅Free Form彈奏，速度更會越嚟越風馳急激，完全衝破任何規範教條，不顧一切狂亂起舞。我開始明白佢哋點解會用Godspeed You! Black Emperor，呢個源自日本某個黑夜飛車黨稱號，作為樂隊名字。
每次聽Godspeed，都會期待任樂章中嗰份山雨欲來、一發不可收拾氣勢來臨，好似將心入面所有情緒集中一起，等待一息間爆發出嚟。無錯，聽Godspeed嘅音樂雖然好痛苦不安，但亦好痛快釋懷，即使一切只係暫時性幻像。
其實據Godspeed成員講，佢哋嘅音樂唔止屬於低調死亡，正如《Lift Your Skinny Fists Like Antennas To Heaven》碟名，就係希望透過誠實真切嘅音樂對話，能夠喺末世困局之中搵到出路。今日睇返呢段說話，尤其重要。坦誠面對自己，從來唔容易。所以呢個世界有好多fake rocker、偽人，從來唔將謊言當做一回事。
回帶一開始條問題，究竟乜嘢係Post-Rock？我到今天仍然唔太清楚。可能有啲似人生，重覆又覆，由唔同片段組成。我又點解會鍾意Post-Rock？可能因為喺重覆又重覆嘅人生中，每個人仍需要有情緒發泄啩。
