輕盈浪漫嘅電音女聲，從來係我杯茶，由Saint Etienne開始，到One Dove、Mono……以至近年嘅Men I Trust，全部都因為呢份情意結而迷上。所以舊年當聽到張蔓姿（Gigi）嘅《深夜浪漫》時候，我係完全叮一聲接通了電 ── 全曲浮游不定嘅電子節拍「榮」吓「榮」吓，Gigi嘅演繹亦全程配合，唱得非常Dreamy，令歌曲有一份捉唔住嘅濛瀧美感。
翻開Song Credit，《深夜浪漫》由Gigi親自作曲填詞；翻查資料，發現從一開始佢已係唱作歌手，亦曾參與「搶耳音樂」計劃，包辦曲詞自然係基本盤。上月尾，Gigi剛推出處女E.P.《WHY AM I HERE》，全部6首歌毫不意外都係Gigi創作，並由李一丁監製 ── 無錯，就係「試當真」當紅組合MC $oHo & KidNey背後音樂舵手。
今次，李一丁為Gigi新碟負責大部份歌曲監製同編曲，帶嚟同豪腎完全兩樣嘅音樂路線。嚴格細分，碟內每首歌都有唔同曲風，游走喺復古與摩登之間；但當由頭到尾一次過聆聽，感覺卻十分之一氣呵成，喺唔同之中仍然搵到連結點。「監製一丁」固然居功不少，另外就如樂評人知音「蛋女子的聽覺測試區」所講，Gigi嘅旋律演繹亦十分重要，以廣東話語感譜曲入詞，極具個人特色風格。
以往Gigi接受訪問，曾提及自己鍾意達明一派、竇唯、黑豹等，直認對「老歌」情有獨鍾。《WHY AM I HERE》成隻碟俾我嘅感覺，未必去到上世紀80年代咁「懷舊」，但確實有唔少片段同90年代嘅Downtempo類近，《深夜浪漫》就係最佳範例，用呢首歌嚟開場亦毫不意外。緊接嘅《不言自明》，換上Gigi老拍檔CHOR（鍾楚翹）負責編曲同監製，雖然轉以電結他為主調，氛氛上就跟《深夜浪漫》一氣呵成彷如姊妹作，同樣夢幻飄逸。
同陳嘉合寫合唱嘅躺平歌《On The Right Track》（陳嘉兼任編曲及監製），更係一首徹頭徹尾Downtempo作品，當年標籤為Chill Out類別，咁啱歌詞都有一句「不如過嚟Chill吓吖」，簡單用一個港式詞彙「Hea」嚟形容呢首歌就最啱Feel。另一首合寫歌《LOVELOST》（w/ Young Hysan）加入Rappin'，但當然唔係Aggressive Style，而係貫徹E.P.嘅輕柔電音主調，Rap都Rap得傷感而浪漫過人。歌曲同時出咗多個Remix版本，換上唔同Rappin'歌詞，不妨當Bonus Tracks一齊聽埋。
《姿態》同《一樣》兩曲應該係《WHY AM I HERE》嘅中心思想作品。《姿態》會唔會係Cantopop史上最佳食字歌名？（反面教材：《將繼衝》）歌詞亦一如歌名，係Gigi一份宣言，亦係年輕人被迫提早成長嘅自白書：「我有我姿態，要看化事態荒唐；我有好心態，笑看這荒謬世界……」更「中」嘅係英文歌詞一段：「It's just a game / let's enjoy the play / Let's enjoy to play」。呢份一語道破世情嘅無奈，我諗起黃耀明當年嘅《做一場給世界看的戲》。
完場曲《一樣》走Guitar-Pop風格，明亮嘅旋律編曲、爽朗嘅電結他彈奏，驟耳聽落好似同碟入面其他作品有所分別，但其實一脈相承，延續《姿態》以至全碟主題：「今天 昨天 明天 一樣／黑色 天空 月光 一樣／重演著 重覆著」。唔少香港人，呢幾年已成長唔少，Gigi卻比我哋更早頓悟。早喺2018年，佢嘅純音樂作品《熨斗》，已透過迷幻電音配合耐人尋味影像，訴說年輕人如何被熨斗熨平從而躺平嘅青春殘酷物語。
然後呢﹖
然後，4年後今天，張蔓姿Gigi推出處女E.P.，特別選用《WHY AM I HERE》命名，既問緊自己，同時亦請樂迷問問自己︰點解我仲喺呢度﹖其實唔需要問，經過呢幾年嚟荒謬世界嘅洗禮，仍然留低嘅，答案早已不言自明。Gigi能夠喺第一張碟已成功搵到自己嘅音樂定位，實在非常難得；再聽返佢早期同CHOR合作嘅歌曲，帶點簡約清新，同樣不落俗套。之前佢同樂隊Zpecial嘅Crossover Live Session亦玩得好出色。未來，相信Gigi會繼續創作音樂（同孖生胞妹張蔓莎一齊Jam歌？）繼續嘗試其他演藝演出（期待再次亮相「試當真」）。That's why she is here。
