自從舊年開設自己網站後，一直好想寫香港樂隊Foster Studio，可惜一直未有合適時機。樂隊喺2020年年尾發表《Another April》一曲後便久無新作，仲以為佢哋已消聲匿跡，但原來上月月初，Foster Studio已靜俏俏回歸，推出全新作品《Go Astray》。
我對Foster Studio嘅喜愛，始於樂隊2017年處女作《Houston》。記得當時樂隊刻意保持神秘，無用真面目示人，純粹以歌會友。《Houston》亦的確有一種魅力，令我聽完一次就馬上愛上。
如果你同我一樣都鍾意New Order，當聽住《Houston》風馳電掣嘅節奏，再配上爽勁電結他同過癮電子音效，感覺就如「新秩序」一樣，將電子＋結他完美通婚；女主音甜美但帶點輕柔嘅唱腔，更為歌曲多添一份Dreamy氣息，呢方面又的確比「新秩序」優勝（的確唔係個個都頂得順Bernard Sumner把拉牛上樹聲線😁）。
Foster Studio組成初期，真係好低調，只用上幾個Emoji嚟交代樂隊兩女一男陣容（ 🤡👩🏻👩🏻）同音樂風格（💻🎸🎹），但完全唔知佢哋係邊個；後嚟樂隊漸漸「浮面」接受訪問兼公開玩Live，先發現佢哋原來係Supergroup ── 2位女成員Chak（主音 / 結他）同Emily（合成器）俱嚟自So It Goes，男成員就係Fantastic Day結他手Chiwai（結他 / 合成器）。3人走埋一齊，刻意唔玩So It Goes嘅暗黑風 / Fantastic Day嘅清新Twee-Pop，而努力嘗試電子搖滾路線；電子及搖滾，如果兩者未能好好做到互相平衡，隨時落得兩頭唔到岸下場；但單聽《Houston》一曲，你會發現佢哋已拿捏得非常出色。
2018、19年期間，Foster Studio喺香港Indie樂圈都算活躍，曾參與Clockenflap音樂節，又為Teenage Fanclub、Gym And Swim、Tempalay香港演出做Supporting Act。但2020年開始受疫情影響，無得出Show玩Live，樂隊發展彷佛一度停滯（相信唔少Indie Band / 獨立音樂人都曾面對同一問題），可幸佢哋仍間斷地發表新作，包括翻玩咗New Order名作《The Perfect Kiss》。New Order唔止係Foster Studio嘅師承學習對象，更係佢哋最愛樂隊之一。事實上佢哋之前出騷時已有玩《The Perfect Kiss》；嚟到呢個錄音室版本，更處處充滿驚喜，又有8 Bit聲效又有Acid Sound，仲玩埋Drum N' Bass！固然原版《The Perfect Kiss》（逾10分鐘MV Live Version）係無可超越嘅經典，但Foster Studio嘅翻玩版本一啲都唔失禮，聽得出佢哋處理電子合成器嘅技術又進一步！
疫情停擺期間，Foster Studio除發表《The Perfect Kiss》同《Another April》兩曲，亦曾上ViuTV音樂節目《十六分音符》受訪，從而對佢哋了解多一點。Foster Studio講過，佢哋從來無打算做全職音樂人，但從訪問中，你會感受到3位成員對音樂嘅熱誠，同感情︰「我想放棄，但又放棄唔到。」亦因此，Foster Studio到今天仍然喺度。
Foster Studio新歌《Go Astray》，驟聽仍然係佢哋最拿手嘅電子＋結他樂風，相比之下無以往咁「好跳」，卻多咗一份沉鬱思緒，尤其鍾意曲中帶點Noisy嘅電結他，同流麗嘅鍵琴撞埋一齊，兩種聽落唔夾嘅Style卻成功撞出火花，帶出歌曲嗰份迷茫不知去向嘅氛圍，感覺就如啟發佢哋創作呢首歌嘅小說《麥田捕手》（The Catcher In The Rye）一樣。
Foster Studio成熟了，但仍然保留一份純真，所以先寫得出《Go Astray》如此坦誠嘅作品。雖然樂隊出歌速度慢，但慢工出細貨，我相信佢哋仍然會繼續夾Band，繼續努力達成未償嘅音樂願望。《Go Astray》發表無耐，Chiwai原屬嘅Fantastic Day，亦喺Facebook專頁發佈近6年嚟首張新相，並留言「Long time no see 👋🏿👋🏿」。無錯，真係好耐無見。期待再見。
