已結業嘅旺角信和地庫CD交易所，係我年輕時留底唔少腳毛嘅地方，當然都執到唔少好貨。要數咁多年嚟最最重要嘅入貨，毫無意外係Felt嘅精選碟 《Absolute Classic Masterpieces》，記得好似五十蚊交易，低價入市，而家 (喺我心目中) 已升價連城。
呢隻亦係我第一張買嘅Felt唱片，記得當年因慕其名而購入，回家聽咗一兩次，發覺平淡到好似白開水，便放底無理佢。
大概過多兩年後，我拎返嚟重聽，今次一聽唔得了啦，隨即買返 《Absolute Classic Masterpieces》嘅volume 2，同埋Felt十張專輯。
上世紀八十年代，Felt曾喺十年時間，推出十張專輯，十張細碟，然後解散。
Felt經典嘅地方，在於佢哋每張唱片都會嘗試唔同音樂風格，由早期嘅Post-Punk同古典低調，到清新結他、矇矓迷幻、小品純音樂、Blues，以至Light Jazz、實驗電子……佢哋都有玩奏過。喺主音Lawrence主導下，其實Felt嘅十年音樂里程，已完全表現出咩稱得上係折衷主義。
實在好難選一張最能代表Felt嘅專輯。由前期結他手Maurice Deebank揮灑自如嘅古典結他彈奏，到後期Martin Duffy一手豐滿多變嘅鍵琴彈奏，都係我所欣賞同鍾意。我更欣賞Lawrence對音樂嘅固執同堅持，處處力求完美，以致有時變得標奇立異同吹毛求疵。不過呢啲都是沙沙石石，無礙Felt嘅偉大。所以我選咗呢兩part精選專輯，涵蓋咗Felt十年嘅音樂種類，係認識呢隊偉大樂隊好好嘅途徑。
Lawrence一直認為Felt嘅音樂好似白開水平淡，的確係。但喺平淡中，你會慢慢嗒出佢哋細水長流嘅韻味，幻化成一抹輕柔色彩，喺大時代入面留下一個淡淡印記，未必好多人發現，但我睇得好清楚，而且唔止我一個，仲有Belle & Sebastian主腦Stuart Murdoch，Girls主腦Christopher Owens，佢哋同我一樣，都係Felt / Lawrence嘅超級fans。
忠於自己喜愛，相信自己嘅美學眼光，好似Lawrence為Felt嘅精選專輯命名做Absolute Classic Masterpieces，好似過份浮誇自大，但時間證明咗，Felt嘅音樂，絕對受得起呢個讚譽有餘。
（文章中部份內容，取自本人昔日為《MCB》寫嘅樂評）
