【Interview】那夜，我躲進Explosions In The Sky嘅世界

（原文上載於2002年《mcb》，現稍作修改，並改成粵文版本）

我一直好想知道，Post-Rock究竟係一種點樣嘅音樂？點解我會鍾意Post-Rock？

嚟自美國德州嘅後搖滾樂隊Explosions In The Sky，早前11月16及17日曾往台北舉行兩場演唱會，由小白兔橘子唱片主辦。好高興能親赴現場欣賞，並同樂隊訪問。其實之前我對EITS著實認識不深，只知道佢哋推出過兩張專輯，其中去年一張《Those Who Tell The Truth Shall Die, Those Who Tell The Truth Shall Live Forever》，喺美國當地取得不俗評價。樂評人更鍾意將拿佢哋同兩大後搖滾班霸Mogwai及Godspeed You! Black Emperor比較。

粗略聽過呢張專輯後，發覺EITS的確玩奏一些「時而沉寂、時而狂飆」嘅Post-Rock音樂。呢個係我對EITS嘅最初印象。

同唔太熟悉嘅樂手做訪問有個好處，佢哋既唔係我崇拜嘅偶像，心理壓力不大，毋須抱著戰戰競競嘅心態。我同EITS四人 —— 兩位結他手Mark Smith及Munaf Rayani、彈低音嘅Michael James，以及打鼓嘅Chris Hrasky，就坐喺台北忠孝東路某家咖啡店，輕輕鬆鬆地無所不談，一切有關音樂嘅事情。

先前好少見外國Post-Rock樂隊來台灣（香港更加係）。想知道點解EITS會應邀遠赴前來演出？

EITS：「哈哈！我哋都無諗過小白兔橘子會邀請EITS表演！世界上有咁多樂隊，真係唔知佢哋點解會揀我哋！但既然時間能配合，我哋好樂意前來，今次更係我哋四人首次踏足亞洲呢！」

EITS組成於1999年，係一隊好年輕嘅Post-Rock樂隊，當初你哋係點樣開始，仲改咗「天空爆炸」呢個咁有型嘅名字？

「我哋都係嚟自德州城市Austin。我哋三人（Mark、Munaf同Michael）已係多年好朋友，一齊聽音樂，好自然想夾Band。後嚟喺市內某間唱片店招聘鼓手，收到Chris回覆，我哋一拍即合。至於樂隊名……靈感源自我哋喺Austin某個電台首次表演，當Session完結後，電台播放一段煙花綻放聲效，Chris便提議Explosions In The Sky呢個名字。」

「天空爆炸」，真係好適合形容EITS嘅音樂，以至Post-Rock。從開首嘅沉寂，緩緩推進，以致一發不可收拾嘅狂亂，然後再回歸沉寂作結。當初點降為會選擇後搖滾作為你哋嘅音樂類別？

「其實我哋係聽Heavy Metal長大嘅，尤其喜歡早期嘅Metallica！但當我哋走埋一齊玩音樂時候，唔知點解，好自然想玩奏一啲無主唱嘅搖滾音樂 —— 係搖滾，Rock，唔單止係Post-Rock，我哋想強調呢一點。」

不過一般輿論，甚至我自己，當聆聽EITS音樂時候，不其然會聯想到Mogwai、GY!BE呢啲後搖滾樂隊，你哋介意其他人咁樣講嘛？

「哈哈，我哋一早已習慣。換個角度去睇，好似Mogwai、GY!BE佢哋已建立一種Post-Rock音樂典範。後來嘅樂隊，包括我哋，或多或少會有佢哋影子。但唔同嘅係，我哋嘅音樂注入好多個人感情，呢方面係EITS同一般技術派Post-Rock樂隊嘅分別。」

十分同意。EITS嘅《Those Who Tell The Truth…》，正正係一張教人思潮起伏嘅純音樂專輯，每個人聆聽都可以有唔同感受。專輯分為Die及Live Forever兩部份。背後嘅創作概念係？

「創作呢張專輯時候，我哋嘅生活正值低潮，太多太多嘅不愉快，但我哋希望音樂上可以俾自己一點點鼓勵。正如封套上戰爭及天使圖案，代表著兩極意念。」

分享一下你哋台北兩場演唱會嘅演出安排。

「兩場都會有唔同曲目編排，而且樂章與樂章之間無停頓位，呢樣係我哋現場演出一貫手法，令觀眾唔單止聽Live，仲可以感受我哋音樂上嘅起承轉合鋪排，就好似一齣電影，由起首至結局，一氣呵成。所以我哋唔可能有Encore環節！」

同EITS四人訪問後，發覺佢哋非常健談，令我以為同緊朋友聊天，然後睇佢哋表演。今次更係我第一次聽外國Post-Rock樂隊嘅Live，心情有點緊張。但最後，我竟然諗唔到點樣形容我當日心情。

只可以好片面咁講，喺EITS長約1小時嘅Live Set，樂隊呈現嘅音樂感染力，比CD專輯強烈數百倍；嗰啲我聽過無數次嘅後搖滾狂飆電結他演奏，現場再聽，感覺已唔單止充滿爆炸張力咁簡單。彷彿嗰一刻，心裡面所有開心唔開心，都完完全全釋放出嚟；將隱藏已久嘅脆弱，鉅細靡遺地暴露眼前，然後融入EITS嘅音樂入面。但平時，我哋點可能如此赤裸裸面對自己？

越來越相信，音樂係同我哋人生平衡共存嘅另一個世界。嗰度都有好多國家，好多人生活，包括Explosions In The Sky。那夜，我便去到佢哋屋企作客，同佢哋飲咖啡傾偈，聽佢哋彈結他玩Live。十分暢快一個晚上。