香城萬眾矚目嘅英格蘭對美國分組賽，最終0︰0和局收場。英軍上場大勝伊朗隨即被英媒瘋狂吹捧；才不過一場後，佢哋又打回原形，變返我最熟悉嘅英格蘭。
平情而論，兩隊都踢出戰術佈署，雙方亦踢得平分秋色，從控球權幾乎五五波，可見和波的確合理。英軍明顯以保持控球在腳為先，寧願迂迴地搓嚟搓去，都唔敢貿然進攻。美軍則守得好有耐性，間歇性反擊更嘅具直接威脅，佩利錫一球勁射中楣，嚇得全城英迷一把汗。「美國隊長」嘅的靈光一閃創造力，或者就係現今英格蘭進攻最缺乏一環，現時隊中大部份中前場球員，踢波都太過強調合理性，比寧咸只係新笠臣，佢同一眾隊友無一個好似昔日荷杜、華度、拿鐵斯、加士居尼咁，可以突然「估你唔到」餵一腳毒波撕破對手防線；霍頓可能算係當中較近似一個，但佢今場未獲派上陣。
九十年代，英國嘅Britpop同美國嘅Grunge曾席捲全球，當年我鍾情英式流麗Britpop結他流行曲，卻對美式橫衝直撞嘅Grunge Rock不屑一顧。人大咗，發現Britpop嘅曲式其實有啲倒模
；至於當年唔識欣賞嘅Grunge，今天重溫，卻明白到佢嘅Powerful力量，可以直指人心。兩種音樂其實各有各好，無所謂高低，只要能感動到人，就係好音樂。所以我同時要俾掌聲美國隊，論今場表現同入球機會，佢哋其實秤先少少，好在英軍最終能守和。B組最後一輪，英格蘭威爾斯內訌一戰固然有趣，但美伊大戰無疑更有話題性。拭目以待。
(原文2022年11月26日喺NowSports網站上載，現改成粵文版本)
