英格蘭最後一場分組賽對威爾斯，最終有驚無險以3︰0取勝，首名出線。不過單係睇上半場英軍全程控球在腳但平淡無奇嘅表現，的確有啲擔心，尤其將首度正選上陣嘅霍頓放喺右翼，相信係為咗遷就同樣正選嘅華舒福踢左邊。戰術大師修夫基如此排陣，實在令人搲爆頭，真係要唱返首Oasis嘅《The Masterplan》送俾佢︰「I'm not saying right is wrong」， 但此舉導致霍頓近乎全廢武功！
不過，戰術大師嘅修為，點會咁容易俾大家估到﹖「Won't make us understand / We're all part of a masterplan」。下半場，修夫基一個簡單調動 —— 將霍頓同福仔位置互調，霍頓踢返佢最擅長嘅左邊，福仔轉踢右，立即令英軍形勢馬上大逆轉 —— 首先是霍頓左邊禁區外搏到犯規，由福仔射入靚到絕罰球，助球隊打破僵局。中場再開波後趁威爾斯驚魂未定，福仔喺右路逼搶成功，傳俾暫時仍然零入球嘅隊長射手簡尼，佢再次變身助攻王，右路傳中予左邊遠柱空晒嘅霍頓輕鬆破網 —— 喺曼城，佢已經喺左路入過好多個咁樣嘅士哥。最後華舒福梅開二度，亦係佢喺右路禁區成功舞嚟舞去，射破丹尼獲特大細龍門。
有理無理，英格蘭就係靠修夫基呢個「神調動」（其實係排錯陣知衰後自我修正），令球隊連入3球，再次大勝而回。論3場分組賽表現，英格蘭只做到穩中求勝，但唔可以稱做勁旅。不過，能夠繼2006年後再次喺世界盃分組賽首名出線，仍然係開心嘅。16強對手係塞內加爾，到時又睇吓戰術大師又有乜令球迷膽顫心驚嘅Masterplan啦。
(原文2022年11月30日喺NowSports網站上載，現改成粵文版本)
