（原文刊登於2004年《mcb》，現稍作修改，並改成粵文版本）
曾有朋友問我有無聽過一隊樂隊叫Adored，我毫無頭緒；朋友再講，佢哋翻唱過Depeche Mode《See You》呢。我知道喇，佢講嘅係瑞典樂隊Day Behavior，佢只係將樂隊處女專輯《:Adored》，誤當成樂隊名字。
每當想起Day Behavior，連帶我總會諗返起呢個有趣嘅誤會。但我已幾乎唔記得佢哋喇。《:Adored》已係1996年作品，Day Behavior因為翻唱《See You》而廣為人知，加上樂隊嘅嬲字陣容，又係玩電子，難免令人將佢哋同偉大嘅Saint Etienne比較；記得那時候，《:Adored》瑞典初版CD早已賣斷市，隔好一段日子先有香港唱片公司代理，我終能擁有一張，真係一張出色電子唱片……以上點滴，都係當年聆聽Day Behavior嘅美麗回憶。
之後一直無佢哋消息，但最近赫然發現樂隊已推出第二張專輯，感覺好似重遇多年無見嘅朋友，我毫不考慮即買。封套上只見主音Paulinda同Carl，惟另一男隊員Tommy仍參與大部份歌曲創作，唔知道佢係咪已離隊，抑或只係「隱形」退居幕後。
無見多年，佢哋依舊別來無恙，送上一首首美妙電子流行曲，好似《The Moments I Couldn't Save》、《Heaven》、《Bleed》好能夠重拾昔日樂隊嘅朦朧電子氣氛；《Devil In Me》嘅強勁Euro-Disco亦十分精彩。當聽到《Close Your Eye》開首嗰段好遊戲機嘅電子琴彈奏時候，我不禁發出會心微笑。只係我唔係太滿意《Give Me》、《Superstar》、《Mon:Ami》呢幾首庸俗Trance-Pop，變相拖低整張專輯質素。
唱片限量版還附送一張13曲Remix CD，係佢哋早前網上舉辦嘅Remix比賽中得勝作品，單係《The Moments I Couldn't Save》已佔7首，不過意外地大部份水準唔錯，聽落一啲都不沉悶，值得為專輯加分。
