2021年，聽多咗好多音樂，但對我嚟講仍有唔少遺珠。其中一隊，係台灣迷幻搖滾樂隊COLD DEW。
嘗試誇張啲形容，或者可以吸引你睇落去。COLD DEW長逾18分鐘嘅《山地情歌》錄音室版本，就係迷幻搖滾版嘅《Djed》！無錯，就係Post-Rock班霸Tortoise嗰首神曲！
不過，COLD DEW更令我聯想到嘅，係佢哋嘅同鄉前輩「波希米亞」。
波希米亞，大概喺20年前千禧新世紀曇花一現，相信而家已好少人記得佢哋。佢哋只出過2張專輯，都係現場演出輯錄而成。錄音質素十分差勁，但掩蓋唔到樂隊強大而即興嘅迷幻搖滾能量。
COLD DEW 2年前推出嘅處男作《2020.02.23 Live at Revolver》，單係睇碟名，已知係一張Live Album，同波希米亞嘅作品一樣。錄音質素比當年嘅波希米亞稍為好，同樣已足夠感受到COLD DEW嘅才華能耐。樂隊由林哲安（主音及結他）、吳征峻（結他）、蔡瑀晟（低音結他）同吳征鴻（鼓）組成嘅「四重奏」，彼此充滿無形默契。當然哲安同征峻嘅旋律主唱及結他Solo屬最前線，亦最搶耳；但絕對唔能夠忽略瑀晟同征鴻組成嘅Rhythm Section，為樂曲提供綿延動力來源。
據知COLD DEW組成初期好怕羞，玩Live時候唔會點講嘢。因為咁而啟發樂隊喺樂曲連接之間加入大量Effect過場，佢哋更自稱玩Effect玩到走火入魔。咁嘅Live Set串連安排，又令我諗起另一著名後搖滾樂隊Explosions In The Sky嘅現場演出，同樣喺樂章同樂章之間無停頓位。「天空爆炸」解釋咁就好似一套電影，俾台下聽眾感受到佢哋音樂嘅起承轉合。
而當起承轉合到結尾，COLD DEW一定會玩奏《六神無主》做完場曲。喺《2020.02.23 Live at Revolver》入面，佢哋更將伍佰 & China Blue嘅《斷腸詩》完美地連結一起，成為佢哋嘅Live神作《六神無主斷腸詩》。《六神無主》原本已經係一首由寂靜推演到充滿爆炸張力嘅長篇搖滾作品。樂曲借大自然山林入詞，講中二病情緒，其實同歌詞工整嘅《斷腸詩》所描寫嘅好相似，不過後者多咗一份豁達。所以將2首歌曲串連起嚟，立即令《六神無主》更覺昇華，或者我根本已當佢哋係同一首歌嚟。
就係咁，COLD DEW憑住佢哋強大嘅現場演出能量，漸贏得樂迷之間口耳相傳同捧場。呢兩年嚟，佢哋毋懼疫情肆虐，努力玩Live，既累積經驗，亦累積Fans。樂隊深明玩奏呢種長篇迷幻搖滾樂章，唔會得到主流認同，但仍繼續堅持，呢個就係佢哋同音樂連結，並呈現俾聽眾嘅方法。
舊年年尾，COLD DEW推出首張錄音室作品《欲欲》，只收錄《雲》、《山地情歌》和《溫泉》3首歌，但長達30多分鐘。佢係一張概念E.P.，將3首作品串連成一個完整故事，並借佛教嘅「欲」，講出人類對欲望嘅追求永無休止。音樂上亦加入合成器演奏，令樂曲氛圍營造更加豐富。
E.P.內焦點作，無疑係佔去全碟超過一半時間嘅《山地情歌》。《山地情歌》可以話係樂隊另一飲歌，喺《2020.02.23 Live at Revolver》專輯亦有出現，當時只得5分鐘唔夠，但歌曲本身好似有生命力，經過幾年嚟無間斷嘅現場演奏同練團室排練之後，最終演變成呢個長達18分37秒嘅Masterpiece。全曲分成唔同片段同面貌，呢方面的確可以同《Djed》相提並論。由起首長長氣氛化鋪排，漸漸轉入山雨欲來氣勢，至中段終於輪到大家最熟悉嘅COLD DEW招牌迷幻搖滾演奏，以及主唱部份，亦係歌曲嘅Live原形。《山地情歌》旋律歌詞的確好有「山歌」味道，但十分簡短，然後緊接狂野／狂亂Free Jam，演奏上卻順勢而行，眾成員嘅合拍默契，已達到揮灑自如境界。末段意外嚟一段既Ambient亦好有民族風嘅變奏，最後突變成急激爆炸演奏收尾。
但其實，成張《欲欲》係比較難抽出任何一首歌出嚟獨立聆聽，而必須一氣呵成感受體驗。好似完場曲《溫泉》嘅前奏，無疑係呼應《山地情歌》結尾；樂曲相對地「短」得多，只得8分鐘左右，但同樣由多個段落組成，音樂編排上好似更精簡嘅《山地情歌》。開場曲《雲》同樣係樂隊玩Live嘅熱門作品，旋律結構相對地較「正常」，亦擁有好靚好搶耳嘅結他和弦彈奏，減去部份迷幻色彩，多咗一份噪音結他嘅濛瀧美感。無錯，有時候COLD DEW都幾Shoegazing。呢首歌大可以做派台歌曲，喺主流媒體及電台播放。
迷幻搖滾，真係可以成為主流之一？如果真係要咁，可能要加入好多商業元素，最終變得不倫不類。COLD DEW受訪時樂觀咁講，佢哋相信台灣樂迷嘅喜好越嚟越多元化，接受能力亦越嚟越高。堅持玩自己想玩嘅音樂，比起只為照顧聽眾口味而玩嘅音樂，無疑真誠得多，我亦相信總會有知音人。只要留意COLD DEW嘅歌詞內容，你會發現絕大部份都同大自然連結；佢哋嘅樂隊名字，亦係嚟自二十四節氣中嘅「寒露」。主音哲安話應該同佢近年愛上爬山有關。爬山就如逃離現實主流世界，回歸大自然母體。COLD DEW嘅音樂何嘗唔係？但逃離、逃避係負面形容詞，《欲欲》所描寫嘅欲念擴張，同樣係令人神傷嘅結局。或者，當我哋真誠地回應大自然，嘗試放下現實中種種欲念，咁先係我哋未來出路所在。期待COLD DEW日後嘅作品，繼續藉大自然去剖析人性種種。
