（樂隊圖片取自Cicada Facebook Page，高啟舜攝影）
追隨台灣室樂樂隊Cicada，唔經唔覺已近10年。坦白講當初係因為鍾意Rachel's而對佢哋有興趣。後搖滾古典，對當年嘅我嚟講，真係一個好吸引嘅形容詞。不過後來越聽得多Cicada嘅音樂，發現「後搖滾古典」的確只不過係一個形容詞，佢哋俾到我嘅聆聽感受，已係另一樣更深層次嘅追求。
Cicada自2019年推出《走入有霧的森林》專輯後，已一段時間無新作（當日好幸運身處台灣買到簽名版CD，至今仍然珍而重之好好收藏）；舊年年初，樂隊舉辦《散落的時光》10周年紀念演出 ── 原來佢哋呢張處女專輯已有10年歷史，唔經唔覺，佢哋已開始步入中生代。踏入2022年2月，Cicada終於正式回歸，推出新作《棲居在溪源之上》。
同以往一樣，Cicada嘅音樂都係同大自然連結。今次主角係台灣中央山脈。「我們以15天的時間，步行超過120公里」。這兩組數字背後嘅體驗同意義，樂隊就放喺《棲居在溪源之上》呢首長超過11分鐘嘅樂曲中呈現。佢哋仲將當日旅程中拍嘅影像剪輯成MV，隊長江致潔（Jesy）亦寫咗一段好詳細嘅文字相片記錄。
Cicada《棲居在溪源之上》MV透過音樂、影像、文字，Cicada已將《棲居在溪源之上》創作緣起、過程、成果，完整展示俾大家。作品完成後，作者已死，就由樂迷我哋各自聆聽同感受。我無去過中央山脈，我嘗試放下手頭心頭所有事情，將人生11分38分鐘完全聚焦喺《棲居在溪源之上》MV嘅音樂同影像，嘗試用耳朵、眼睛，同個心去感受呢首美不勝收嘅樂章。
我感受到，由起初隨心隨意漫遊，漸漸開始深入，會為某一處景色某一幕，停步落嚟細意欣賞。世界太大，云云萬物眾生之中，人類自稱萬物之靈；但當我哋回歸大自然母體，就同其他眾生一樣平等，亦一樣渺小。有所得著後，我隨音樂繼續行，行完未啊？好似就快行完，但原來仍然未，前面仍有另一個谷地等我跨過。到旅程真正完結，其實仍未完結，我不過返番去城市，返番去我嘅人生旅程，繼續行落去。
從大自然睇見自己嘅渺小同局限，亦睇見自己同大自然嘅連結。透過外在感官同內心感受，一起體驗呢個世界種種一切，呢種體驗先係最真切。Cicada話佢哋呢次旅程「不以登頂為目標……而是揣摩著山的視角」。我哋大部份人嘅人生，其實並無咁多高低起伏同刺激，但有時已足夠令平凡嘅我哋困擾不已。我哋可以學學Cicada，嘗試從另一角度去揣摩、審視身邊嘅事物，同自己。從一粒沙裏見世界，一朵花裏見天國。手掌裏盛住無限，一剎那就係永恆。
反覆細聽《棲居在溪源之上》多次，感受到Cicada呢10年來嘅進步同堅持，同時仍有一份後搖滾氣息。能夠找到自己喜愛嘅音樂，並一直堅持 / 追隨，係一種福氣。希望Cicada今年內仲會有後續作品，期待佢哋推出新專輯。
