2022年嚟到尾聲，好開心收到今年最後一份音樂禮物 —— Charming Way兩首新歌《Fall Back To Bed》同《想像想像》。呢兩首歌，亦係樂隊首次以廣東話創作，對佢哋而言亦意義非凡（出年應該有得參加叱咤喇）。
《Fall Back To Bed》應該係主打作，歌曲MV同告登陸Youtube。Intro琴音已十分搶耳，伴隨著優美而溫柔嘅Verse主唱，再漸次加入鼓、低音結他同電結他，我第一個感覺係非常之Queen，唔係講笑！再到中段嘅和音同電結他Solo，更加肯定我呢份感覺。歌詞由Oscar負責，內容某程度上竟令我聯想起The Smiths嘅《Asleep》，當然無Morrissey寫得咁絕望，但末段「一早都過去 / 沉迷沒有罪 / 只想一刻倒頭睡」以至最後一句「就地睡去」，其實都幾死亡。
《想像想像》由小克填詞，一睇歌名似向Charming Way所屬廠牌Imagine Imagine Imagine Records幽咗一默，其實係向Johnn Lennon嘅《Imagine》致敬。一見到John Lennon大名，大致已估到歌曲內容充滿正能量，但又未致於太過火︰「理想的終點 / 不再靠想像 / Live the dream / Breathe in reality」。提醒大家諗到就要做，唔係就只流於冷氣軍師、紙上談兵。
亦正如今次Charming Way首度唱Cantopop，同樣兌現樂隊之前嘅承諾，亦係佢哋吸納主流樂迷嘅第一步。音樂上，兩曲的確比以往Mellow咗，但樂隊嘅Indie氣息仍然保留其中。個人而言，好鍾意《想像想像》入面嘅Jangle / 英倫電結他，以及充滿空間感嘅鍵琴彈奏，呢啲仍然係我一直鍾情嘅Charming Way元素。
來到2022年今天，全世界嘅歌手 / 樂隊已好少出實體12吋大Single，反而每隔幾個月會發布新歌上串流平台，以保持人氣流量。Charming Way自年頭推出《Blue Moon Day》後，潛伏大半年創作出佢哋第一同第二首廣東歌，值得印製成實體Double A Side細碟作收藏。期待樂隊下次Cantopop，會由主音Aaryn / 其他成員親自填詞。
