每個人都有佢唔同角色扮演，樂隊 / 音樂人亦都係。由主音Aaryn、結他手Kalun、低音結他手Ajax同鼓手Terry組成嘅香港獨立樂隊Charming Way，佢哋所選擇嘅，就係志切玩奏出最Classic嘅英倫結他流行曲嘅角色。
第一次聽到Charming Way，係佢哋陽光夏日醒新作《I Don't Speak Your Language》；呢首絕對係一首人見人愛嘅作品，就算你無聽開英文歌，都會為歌曲入面嘅爽勁結他＋流暢旋律感到精神為之一振；再配上一個開心遊船河MV，無論聽覺同視覺都令人非常享受。對我自己嚟講，由聽到呢首歌第一刻開始，已想講「嘩乜咁似The Drums嘅？」嗰啲好Jangle嘅結他Chord、充滿空間感嘅Keyboard彈奏，完完全全係The Drums最顛峰時期嘅表現。
另一角色扮演
因為《I Don't Speak Your Language》，我開始留意Charming Way──但原來我一早已認識樂隊主音Aaryn──佢同時係TVB《愛回家》入面嘅補習天王佐治。不過演員身份嘅張明偉，似乎一直無影響佢兼任香港獨立樂隊主音嘅角色，直到早前。早前，佢決定同電視台講拜拜，言談間令大眾感受到佢對演戲的確有熱誠，只可惜好多時喺建制入面，往往充滿好多制肘同妥協，暫時離開一下，集中做好音樂人嘅角色，未嘗唔係好事。
事實上，之前都唔太見Aaryn借《愛回家》嘅名氣嚟幫助Charming Way提升人氣，頂多因為咁而上多幾次大台音樂節目演出；呢方面我係幾欣賞，演戲還演戲，夾Band還夾Band，亦同Charming Way俾我嘅感覺好一致──無乜花巧、唔算好有Gimmick，只希望樂迷將焦點放喺佢哋音樂身上。
回歸音樂初衷
好自然地，Charming Way嘅同名處男專輯，亦係一張好直接、純粹以歌會友嘅大碟，開場曲《I Don't Speak Your Language》已唔在講，緊接嘅《Mt. Fuji》同《Exit》，前者浪漫後者神秘，同樣以氣氛化鍵琴彈奏做主調，但唔會過份搶鏡，結他、低音結他同鼓各自謹守崗位，尤其鍾意佢哋錄音上特意將Ajax低音結他彈奏條Track調校得較「出」，配合Terry紮實嘅鼓技、Kalun一手踩行Pedals嘅電結他彈奏，以及Aaryn極具可塑性嘅聲線（佢同時負責彈Keyboard），凸顯樂隊四人合拍無間。
網上睇樂隊訪問資料，佢哋早喺2011年已開始玩音樂，但講到Charming Way正式誕生，算係3年前佢哋推出《Spinning》一曲開始，有趣係呢首歌卻排喺專輯最後一Cut出場。旋律歌詞多年前已寫好，記錄咗Aaryn當年美國畢業後四處流浪嘅感受。佢喺MV文字備註入面，亦特別提及選呢首歌成為樂隊第一首細碟嘅意義：「是它再次喚醒了我們對音樂的初衷，就是純粹地因為喜歡音樂，所以為音樂而努力。」
個人十分欣賞Aaryn呢份坦誠，論技術Charming Way未必好勁好勁；但論歌曲嘅氣氛同感覺營造，卻十分之出色。《Second Coming》（唔關The Stone Roses事）亦象徵樂隊以Charming Way名義「二度回歸」，更係「滿血回歸」──歌曲長長嘅音樂前奏非常Space Rock，同時帶啲啲迷幻色彩，Vocal亦調校得非常「飄」，聽完真係令人「榮」到升上天；雖然未去到Spaceman 3 / Spiritualized嘅Level，但已經係好高質嘅太空搖滾！《Hot Air Balloon》則回歸簡約Acoustic風格，初聽唔算搶耳，但細味意內言外嘅歌詞，實在不得不愛上呢首結他Ballad：「They fly up to the rainbow / As though there's no tomorrow / We know somehow we've got to carry on」。
逝去嘅維多利亞
最後，我特意將《Victoria》留到呢度先寫。我應該點形容呢首歌好呢？基本上由歌曲第一粒音開始，我已經完完全全被吸引過去，然後不斷沉溺其中，唔能夠自拔。《Victoria》包含咗我所鍾意嘅一切英倫結他流行曲元素，可以簡單形容佢係一首生於90年代Britpop時期嘅歌曲，但其實唔算十分Britpop。歌曲嘅結他Effect同Chord Progession，介乎喺Indie Rock同British Rock之間，好似有啲似Radiohead，但更令我聯想到嘅，係90年代香港一隊較少人認識但非常經典嘅獨立樂隊，Chaos。曾經有後悔，點解兩年前我無聽到《Victoria》呢首咁出色嘅本地Indie作品？不過嘗試換個角度思考，假設我十年後先會聽到呢首歌，我相信，感覺會同而家一樣震撼。
Charming Way講過，佢哋雖然主力寫英文歌，但歌詞內容離唔開香港呢個地方。而《Victoria》，就係指維多利亞港，同埋嗰個漸漸離我哋而去嘅香港。就算我點樣越聽越沉迷呢首歌、點樣懷緬昔日種種美好，但一切已經返唔到轉頭喇。就好似樂隊2年前曾喺 TVB《樂勢力》節目入面玩過《Victoria》嘅Live；嚟到2021年今日，已經無可能再發生喇。
Never Turn Your Back
既然無得返轉頭，我哋可以做啲咩？Charming Way今年3月玩咗一場「City Jungle Live」現場演出，非常精采。一開場玩咗首新歌《R.P.G.》（無收錄喺專輯入面），簡單直接爽快嘅Guitar-Pop底蘊下，Aaryn筆下歌詞同樣直接，我哋每個人喺打機玩RPG時候，都試過沉迷遊戲中角色故事設定，藉此逃避現實：「Now the world has become a weird place / Is it too late to join the black bloc parade / Trying to save tomorrow day」。沉迷音樂，同樣可以令我哋逃避現實，但同時佢有另一面作用。有留意Aaryn嘅社交平台嘅話，會發現佢有同比佢更年輕嘅年輕人一齊Jam歌。Charming Way嘅官方Youtube頻道有寫：「他們的音樂被形容為具有復古味的Alternative Rock。通過將九十年代盛行英國樂隊的聲音與廣東曲式的旋律融為一體 」。其實自己覺得佢哋唔算Retro，而係Classic；旋律亦一啲都唔Canton-Pop，不過我會熱切期待佢哋日後嘗試唱廣東話。喺期待同等待期間，我會繼續不停聽住呢張咁出色嘅處男專輯。十年之後，《Charming Way》將會成為一張Timeless嘅香港本地樂隊作品。
