2024年剛開始不久，好似好多人已感到無比氣餒，或者因為佢哋悲觀，但我卻興奮莫名 —— 全因兩隊我非常非常喜歡嘅樂隊Camera Obscura及粉紅A，不約而同喺2024年1月31日推出全新歌曲《Big Love》及《不能同意更多》；加上另一隊我最愛Britpop樂隊Shed Seven同於上月推出回歸專輯《A Matter Of Time》，2024年，將會係充滿期待、希望嘅一年！
Camera Obscura 傷痛過後再出發
每年1月1日，我都會聆聽Camera Obscura昔日名作《Happy New Year》應節一下。其實呢首歌只係歌名應節，歌詞非關樂觀快樂事，不過咁樣先夠Indie精神嘛。
不經不覺，原來Camera Obscura已組成接近30年。樂隊自2013年《Desire Lines》專輯後一直未有新作，源自鍵琴手Carey Lander 2015年不幸因癌病逝世，眾成員人大受打擊，尤其主音Tracyanne Campbell。傷痛過後，樂隊社交平台間中仍有更新，直至日前，Camera Obscura久候多時新細碟《Big Love》終告面世，同時宣布5月發行新碟《Look To The East, Look To The West》。
實在好耐好耐無聽Camera Obscura新歌啦（雖然Tracyanne六年前曾組成One-Off樂隊Tracyanne & Danny出過一隻碟），今次呢首《Big Love》帶點點Country味道，一聽已完全受落，仍然係我所鍾愛嘅Camera Obscura風格，當然你斷不能奢求樂隊玩返當年嗰浸蘇格蘭獨有Twee-Pop味道，事實上對上一張《Desire Lines》佢哋已變得圓渾成熟；新歌《Big Love》繼續佢哋呢種成熟清新曲風。其實只要聽到Tracyanne嘅Vocal，我就會有理無理照單全收。
粉紅A 不能喜歡更多
粉紅A嘅《不能同意更多》，聽落就真係有啲Twee-Pop味道，特別係Intro結他掃撥有啲低能，令我諗起AMK。粉紅A玩呢類清新Twee-Pop / Jangle-Pop向來有一手，中段嘅電結他Solo簡單得來又動聽入腦（我估係Rodney彈），稍嫌末段音樂演奏有啲短，唔係太夠喉；不過唔緊要，粉紅A已鐵定今年8月24日舉行專場音樂會，到時玩Live相信會玩得更長更精彩！
每次寫粉紅A，我都盡量迴避談論歌詞。佢哋嘅歌詞實在寫得太出色太出色，往往令我唔敢落筆，又或者我唔想令人有「詞大於曲」嘅感覺，講真粉紅A無論曲詞編都係超班，每一Part都值得拎出嚟細緻分析。不過我可以大膽講，粉紅A歌詞中嗰份曖昧、隱晦手法，喺香港屬無出奇右，兩大黃姓「詞神」都要行埋一邊。
《不能同意更多》歌詞，令我聯想到張洪量《再會思春期》，同樣就一個Topic不停拋出一大堆想法，引導聽者不停去思考。《再會思春期》嘅Topic係愛情，而《不能同意更多》係愛，對一個人 / 一個地方嘅愛。
