Green!Eyes從來唔係商業主流樂隊，唔會令大部份人一聽愛上；但只要你一聽，已聽得出佢哋並非一般層次樂隊，或者可直接用「好堅」一詞形容。
我第一次聽Green!Eyes係幾時嘅事？大概十多年前吧，當年應係因為樂隊已故低音結他手哲毓同屬Tizzy Bac成員而留意佢哋；其時喺Youtube睇到《Animal Suit》嘅Rooftop Live Session版本——Rooftop即係Green!Eyes主腦老王（王昱辰）家中錄音室Rooftop Audio嘅名稱。
《Animal Suit》呢個Live版本拍攝手法，令我想起日本樂隊Clammbon嘅《Re-Clammbon 2》。同用上多組鏡頭，聚焦拍攝眾成員及客席樂手嘅演奏；透過影像，將《Animal Suit》一曲嘅能量放到最大，中段嘅轉折位演奏（由02:25開始聽），相信係流行音樂史上其中一段最精彩嘅過門。
其時Green!Eyes有零零星星推出一些EP及單曲，但當年網購仍未發達，香港比較難買到；佢哋2015年來香港Hidden Agenda嘅音樂會，我亦唔知點解錯過了。後來到2021年風籟坊復出發表《Demo 丙》，背後監製正是老王，歌曲中結他音色如此原始及原汁原味，可得歸功於老王嘅錄音室功力。
喺台灣樂圈，老王已成為極具份量嘅監製及錄音師。佢嘅錄音室，亦由Rooftop Audio變為MoriSound Studio。忙於為其他歌手樂隊製作之餘，數年前Green!Eyes亦告回歸，斷斷續續有過數場演出；2023年曾發表新歌《I See You From Afar》，去年年初就為慶祝樂隊成立20周年，在The Wall演出一場。
不過，以上一切總覺唔太夠喉，相信老王亦如此認為。於是喺去年夏季末到秋天，老王老遠跑去英國，以快刀斬亂麻方法，獨力錄下Green!Eyes回歸專輯《Stigma》（嘅大部份歌曲），回台灣後再請來樂手好友加上色士風及大小提琴等，完成呢張2024年和2025年之間嘅精彩之作。
老王喺社交平台談到《Stigma》緣起，第一句便提到哲毓。而我自己都期待Lawrence日後會寫出甚麼作品去懷念Martin Duffy。對熟悉老王嘅朋友及Fans而言，《Stigma》有著重大意義。不過呢篇文章，我希望以唔太認識佢及Green!Eyes嘅樂迷為對象，真心推介呢張專輯俾你哋，佢值得讓更多人聽到。
熱愛搖滾嘅朋友，可先由專輯第四首曲目《The Cure》聽起。充斥全曲嘅琴音與電音，以及中後段加入嘅Free-Form色士風演奏，其實骨子裡盡是搖滾靈魂。如果你堅持無電結他不歡，《The Cure》現場版，你一定聽得淋漓痛快。「Come on, come on, karma come up」，其實《The Cure》嘅旋律亦非常Catchy呢。
緊接《The Cure》嘅《Autism》，真係以電結他主導，既重型又豪邁，可會令你重返90年代嘅美好時光。還有《Shallow》，請來洪佩瑜合唱，旋律好有長青調子，越聽越有味道，屬非常高質嘅Alternative Pop，就如老王所言，呢首歌係《Stigma》嘅入門。歌曲中嘅結他音色，可會令你想起邊隊樂隊？
如果你聽完《The Cure》、《Autism》及《Shallow》三曲感覺唔錯，Green!Eyes呢張新專輯，相信你一定會鍾意。從頭聽回碟內第一首《The Fall et Battery》，罕有地以鋼琴Ballad開場，一開始已殺個措手不及、帶領聽者進入傷感狀態；惟至中段曲風一轉，彷佛變成另一首歌曲。當日自己第一次聽時候，已幾可肯定《Stigma》絕非一般專輯，它就同Green!Eyes以往作品一樣，一切循歌者嘅感覺游走，從來唔會向主流妥協。
呢種形式音樂，絕對唔會吸引大多數人眼球，但總會有一班知音人愛煞。我個人非常喜歡點題曲《Stigma》嘅悠然，謝明諺嘅色士風吹奏尤其出色；佢嘅出現，還有老拍檔周頌玥嘅大提琴（以及其他參與樂手），令專輯中嘅老王，並非孤單一人。
我嘅心水選曲，還包括《Grey》和《The Greatest》，彷如開場曲《The Fall et Battery》延續，喺同一首歌曲入面包羅多種音樂風格 —— 平時我哋講折衷主義，通常係用一整張專輯去呈現，但老王／Green!Eyes厲害之處，佢用一首歌時間已經做得到。
Green!Eyes嘅《Stigma》，就如碟內《The Greatest》歌名所言，真係一張偉大專輯；而內裡收藏嘅細密情感，就要你搵返Green!Eyes昔日嘅歌曲聆聽、重頭認識樂隊及老王嘅歷史多一點，先可以明白了解。不過呢一切都係後話，最重要係《Stigma》已在這裡，靜待全世界每個角落嘅知音人，發現佢喺黑暗中閃亮嘅存在。
