（原文刊登於2004年《mcb》，現改成粵文版本，並稍作修改）
有一日前往「阿麥書房」攞陳綺貞最新細碟《旅行的意義》，剛好遇上一班同樣訂購咗單曲嘅綺貞歌迷，佢哋排排坐著，有人拎起結他，跟住碟內附送樂譜，彈起《旅行的意義》，亦有人隨音樂輕輕唱著，氣氛好溫馨、好和諧，有啲似細個上唱遊堂。
我留咗一陣就離開。嗰種溫馨、和諧嘅感覺，對我嚟講，有啲疏離。回程路上，我不停聽住《旅行的意義》，細閱碟內多張綺貞拍攝嘅風景照片，閱讀歌曲歌詞。《旅行的意義》仍然係綺貞一貫Acoustic小品，細水長流嘅平淡曲式，只要係佢嘅歌迷，一定會照單全收。但忽然，我好想問自己，究竟我有幾鍾意綺貞呢？「卻說不出你愛我的原因。」
正如旅行。當我踏遍世界多個地方，當多姿多采已變成規律，漸漸我發現，自己亦迷失喺旅行中，不知去向。亦正如愛情。「你離開我，就是旅行的意義。」
