2023年剛過去。過去呢一年，全世界談論最多係乜？相信係AI。隨住ChatGPT舊年突然爆出，好多人開始擔心我哋將被AI取代。但同時，好多人又湊熱鬧同ChatGPT傾偈，笑佢成日講錯資料好鬼渣。
一邊用一邊鬧又一邊怕，人類從來都係咁矛盾，舊年年中爆出嘅AI家駒就係最佳例子，好多人聽後為之感動不已，亦有好多人質疑會否引致版權、道德等問題。
本地獨立樂隊Charming Way，去年就嘗試用另一種方式同AI合作，「邀請」ChatGPT一齊寫成《High On You》呢首作品。結他手Kalun表示編曲亦有用上Digital樂器演奏，更叫樂迷聽完估下邊啲係真人彈邊啲係電腦彈。女聲和音其實出自主音Aaryn，但透過AI輸入Scarlett Johansson聲線而變成女聲。最後，歌曲嘅動畫MV，AI同樣有份「Gen圖」。
Charming Way早前已喺訪問分享《High On You》嘅創作緣起同過程，詳情可以睇以下片段，在此不贅：
我一直相信，科技本來係中性，主要視乎人類如何運用。記得當年電子合成器面世，同樣出現爭議 / 質疑 —— 㩒幾個掣，就模擬到成個管弦樂團演奏？呢啲音樂根本毫無感情，完全唔入流！
不過，依我個人聆聽體驗，當年我會為Pet Shop Boys《Jealousy》末段充滿氣勢、一瀉千里嘅仿弦樂演奏而感動；This Mortal Coil《You And Your Sister》以合成器彈出令人神傷嘅結他和弦，係我嘅Life-time Favourite。還有Depeche Mode《A Broken Frame》嘅溫暖電子、Kreidler《Eve Future》嘅電子古典、Ladytron 、Plone、浮世繪、粉紅A……電子音樂，一樣可以充滿人性化感情。但首先，你要寫出感動人心好作品。
咁《High On You》係咪一首好歌？Charming Way笑稱只係B Side作品，但我認為相當唔錯，延續樂隊一貫英倫結他流行曲風格。當然，我認為最重要係樂隊願意大膽嘗試，透過同AI / ChatGPT合作創作，探討未來音樂發展，以至人類發展嘅唔同可能性。
只可惜，人類發展科技，最後往往會被科技玩死。電子音樂發展至今，好像《Jealousy》只屬於少數派，更多係鳩流流卻大受歡迎嘅EDM。同樣地，我可以悲觀預言，未來只有少數人好似Charming Way，認真看待AI / ChatGPT；我哋更鍾意將同一樣嘢玩爛。未來，AI / ChatGPT只會Gen出更多更多音樂 / 圖片 / 動畫 / 影像，為我哋提供更多所謂方便，同娛樂；而人類，漸漸忘記自己，原來都可以創作。
AI不斷進步，人類不斷退步。以上唔係乜嘢新鮮觀點。以往唔少科幻小說 / 影視作品，例如《I, Robot》、《電腦奇俠》、《Wall-E》等等，同已預言AI / 機械人帶嚟嘅深遠影響。未來嘅世界，唔係人類學習點樣善用AI，而係AI學習點樣同人類共存，繼而控制我哋。其實唔使等未來，其實一直已經發生緊。
