因為鍾意本地純音樂樂隊「假日貞操」，一直有留意佢哋同漫畫家黎達達榮嘅合作。樂隊嘅《Acid Rain》動畫MV，以及多張作品封套設計，都係出自黎嘅手筆。
最近，黎達達榮又同另一隊本地樂隊「宇宙幽靈」Crossover，咁啱佢哋同「假日貞操」 一樣，都係玩純音樂。第一次接觸「宇宙幽靈」（Uchu Yurei），來自樂隊入圍「搶耳音樂」、獲邀參與2021年尾推出嘅合輯《EUM001: ups and downs》，貢獻一曲《Phantom V.Z.》。
由Dimitri（結他手）、Meci（鍵琴）、Lister（低音結他）、Anthony（色士風）、Salome（小號）、BaobaoTommy（鼓）組成嘅「宇宙幽靈」，一行六人已甚有架勢；加入Brass Section成為樂隊固定成員，喺香港Indie樂圈亦甚少見。創隊成員Dimitri與BaobaoTommy，一個鍾意日本Game Music，一個鍾意日本電影／劇集Soundtrack，由此定立「宇宙幽靈」嘅風格：熱血沸騰嘅純音樂。聽著《Phantom V.Z.》已充滿緊湊搖滾張力，亦帶有濃濃日系動畫BGM味道。後嚟此作推出以XR（延展實境）技術拍攝嘅MV，樂曲並獲徵用喺Man僧漫畫《0課特工》嘅宣傳錄像中。
2022年至今，「宇宙幽靈」繼續努力創作及玩Live，共發表《Jinsei》、《WTFIS》及《Defect》3首作品，其中《WTFIS》更係佢哋嘅野心長篇作。除Brass Section，再加入Orchestra Section演奏。全長逾7分鐘，由多個高低起伏段落組成，好比將一整套電影Soundtrack／遊戲OST濃縮一起，編排充滿戲劇轉折感，卻一起氣呵成直落，毫無冷場；眾成員及客席樂手亦有Solo位一展身手。如果眾人夠氣又夠力，大可試試現場演出時玩奏延長版《WTFIS》！
不過，《WTFIS》真有機會出現一個延伸版，亦係文首提及「宇宙幽靈」同黎達達榮今次合作計劃 —— 希望將《WTFIS》背後想表達嘅意念，化身成漫畫及MV呈現，計劃現正進行眾籌中。從現時釋出嘅資料及預告片段中，得知《WTFIS》（全名為《Where The F Is Satan》）一曲代表樂隊眾人對地獄嘅「幻想」，黎達達榮聽過之後覺得好有趣，決定將樂曲漫畫化。佢筆下嘅地獄世界及角色，點樣配合《WTFIS》嘅音樂編排，同時帶出漫畫版獨有嘅故事內容？現時無謂作太多猜想，行動支持最實際。我個人希望，「宇宙幽靈」同黎達達榮可以將呢個Crossover創作概念繼續延伸落去，最終成為香港版嘅Daft Punk x 松本零士《Interstella 5555》 ！
宇宙幽靈 X 黎達達榮《WTFIS漫畫眾籌》Kickstarter網址
