世界盃進入最後直路，4強首戰阿根廷喺正常發揮下，以3:0輕取之前表現驚艷嘅克羅地亞，同時報卻上屆分組賽慘敗予格仔軍團之仇，剛好那場賽果係相反嘅0:3。用「Sweet Revenge」嚟形容阿根廷呢場漂亮勝仗，可以話最適合不過。
《Sweet Revenge》係日本音樂教父坂本龍一90年代嘅經典專輯，亦係碟內一首美不勝收嘅同名鋼琴純音樂。正如今日阿根廷嘅甜蜜復仇，佢哋呢一刻嘅快樂，已毋需（歌詞）形容，一切盡在不言中。
其實今場一開波，克羅地亞係控球佔優一方，阿根廷見勢便順水推舟縮後穩守，伺機打突擊。效果顯而易見，上半場兩球入球，同樣係喺後防成功奪回控球權後突破克羅地亞防線，藉住前鋒侯利恩艾華利斯嘅速度，由佢分別搏得一球12碼及一球進帳。下半場美斯嗰球漂亮盤扭傳中造就艾華利斯梅開二度，既殺死比賽，相信亦會成為今日各大傳媒及社交網絡不停重播及吹捧嘅流量密碼。
阿根廷自第1場「落筆打三更」輸俾沙特阿拉伯後，教練史卡朗尼立刻自我修正，一步一步調整陣容、戰術及狀態，將年紀已大嘅迪馬利亞放後備、靈活調動兩名前鋒拿奧達路馬天尼斯與侯利恩艾華利斯、擅用身高不足但球味十足嘅中堅利辛度馬天尼斯，最終令球隊繼2014年巴西世界盃後再次殺入決賽，史卡朗尼嘅功勞值得肯定。。
近日，坂本龍一發布佢嘅網上鋼琴獨奏會「Ryuichi Sakamoto：Playing the Piano 2022」；樂迷相信，呢次好有可能係罹患直腸癌嘅音樂教父最後一次Live演出。而今屆世界盃，亦係球王美斯最後探戈，他能否喺本周末舉行嘅決賽中再度Sweet Revenge，抹去8年前決賽隱形嘅陰影，率領阿根廷高舉世界盃？
（原文刊登於2022年12月14日Now Sports網站，現稍作修改，並改成粵文版本）
