（原文刊登喺2004年《mcb》，現改成粵文版本，並稍作修改）
直至今日，我都係唔知道，點解佢會鍾意Jeff Buckley。
當年我哋係好Friend嘅同學，成日一齊踢波、打機、乜都傾一餐；直至佢同屋企人移民美國紐約，我哋轉以書信繼續往來，信嘅內容都離唔開生活逸事啊、追女仔拍拖等等。然後有一次，佢突然問我有無聽過一個美國創作歌手叫Jeff Buckley，佢啱啱出咗張專輯叫《Grace》。
嗰陣時係1994年，我正沉迷緊Brit-Pop熱潮中，屬典型英國派；對美國嗰邊嘅Grunge Scene從來唔算投入，更何況係一個（當時嘅我）並唔認識、亦無興趣認識嘅美國歌手？繼後嘅信件中，佢都仲有提過Jeff Buckley幾次，譬如睇過佢嘅Live啊等等，不過見我無著意回覆，之後就無再同我講Jeff Buckley、音樂，以至其他。雖然信仍然繼續有寫，但漸漸發覺彼此話不投機，內容亦越嚟越公式，一切已變得可有可無。
我哋最後一次通信係三年前911事件發生後，佢話之後會移居英國，但無講原因，我亦無再寫信問。
後嚟，我終於買返Jeff Buckley嘅《Grace》，返屋企匿喺房入面聽；當聽到《Hallelujah》一曲，唔知點解，忽然好想喊，但最後點都喊唔到出嚟。
《Grace》係Jeff Buckley唯一一張正式專輯，亦係最後一張。當年佢背負音樂人生父Tim Buckley嘅名聲而出道，壓力可想而知。專輯入面，佢嗰種復古而煽情嘅搖滾Ballad曲風，明顯同當時全球大盛嘅粗獷Grunge背道而馳，但卻甚得老一輩，或所謂守舊派樂迷嘅歡心，初試啼聲反應總算不俗。繼後兩年，佢忙於舉行全球巡迴演出；然後喺1997年灌錄第二張專輯期間，Jeff離奇喺密西西比河遇溺身亡，享年30歲。
2004年，係《Grace》推出10周年嘅紀念日子，唱片公司理所當然再度發行，以雙CD加DVD嘅豪華形式包裝，無論對新舊樂迷嚟講，相信都有一定吸引力。Disc 1係專輯Remastered版本，今日聽返呢批舊作，一啲都唔覺過時；更會發現近年掘起嘅名字例如Coldplay、Starsailor、Ryan Adams等，明顯深受Jeff Buckley嘅「感性搖滾」風格影響；Radiohead當年睇過Jeff嘅現場演出後同樣深受感動影響，最終更幫助主音Thom Yorke有信心唱到《Fake Plastic Trees》嘅假音添！
Disc 2輯錄13首罕有曲目，可以感受到Jeff較實驗及即興一面，譬如長達14分鐘嘅《Kanga-roo》，已盡見Jeff Buckley同佢樂隊嘅現場演奏功架。另一首《Lost Highway》亦讓Jeff嘅完美聲線，得到淋漓盡致發揮。
DVD收錄《Grace》時期5首Music Video，再附加一段Documentary，係樂迷認識呢位一代傳奇歌手嘅好機會。呢三年嚟，我就係不停地買返一款一款Jeff Buckley嘅唱片，拼命聽返他一首一首作品，希望能夠令我重新認識佢，但最後都係唔得。正如我可能永遠都唔會知道，我嗰位朋友點解會鍾意Jeff Buckley一樣。
亦正如有啲嘢，失去咗就係失去咗。我哋之後做嘅一切，都已經無用，包括追悔。
