電子音樂（而家啲人稱為EDM），真係幾蝦人玩（同聽）。器材、軟件同混音等固然重要，但一般較難用抽離、中立角度品評技術高低；簡單嚟講，我聽電子音樂，主要都係講啱唔啱Feel。
本地唱作歌手陳嘉（Chanka），我自己聽落，就覺得好啱Feel喇（而家啲人稱為啱Vibe）。
2022
行家一出手，便知有沒有。陳嘉早前發佈歌曲《MTR HATER》，短短1分多鐘內，充斥著迷離而零碎嘅電子節拍，帶點點迷幻味道，結尾完結得既突然而又神來之筆。雖然只係習作式創作，但如果呢首歌有Full Version，一定會好正斗，亦真正反映出香港人對地鐵嘅感覺，Haters gonna hate，呢個先係我哋現實世界情緒發泄；羅先生《東鐵過海真的很興奮》只屬於FF美好幻想存在！
留意陳嘉，已有一段時間。今年年初佢現身張蔓姿處女E.P.《Why Am I Here?》，同Gigi合寫合唱一曲《On The Right Track》，好鬼電子Downtempo風格，音樂底做得非常唔錯。後嚟發現Chanka自舊年年尾開始密密出新歌，原來係佢同作家沈卓怡合作嘅音樂＋文字企劃《Human Heart》，打算一年內出12首歌曲＋文章，描繪城市人12種情緒。至今已有5 / 12進度，最新作品係《Hypocrite》。
因為企劃仍在進行中，我打算日後先一次過品評，不過都要讚陳嘉同沈卓怡呢個概念好正，令我諗起The Wedding Present當年一年出12隻七吋細碟咁癲！繼續努力加油！
《Human Heart》企劃以外，陳嘉今年亦同另一唱作歌手Anna hisbbuR合作《Someday My Prince Will Come》，淡淡然嘅爵士味，嗒落確係有啲韻味。歌詞以韓、英雙語寫成（臨尾加上廣東話對白），非母語創作有助大家純粹感受2人甜美雞仔聲線演繹，彷彿Vocal已融入歌曲成為樂器演奏一部份。
2021
舊年，陳嘉亦發表第一首廣東話作品《無恙》，走迷幻電音風格，可以形容為電子民謠，旋律唔算太Pop；連同佢之前為同名藝術展覽而寫嘅英文歌《ETHOS OF CITIES》，我會同時形容做Art Pop，即早排憑《Running Up The Hill》再度走紅嘅Kate Bush嗰類型Feel。陳嘉嘅雞仔聲當然唔似Kate姨咁「撚聲」，鹹魚青菜各有所愛，我就鍾意雞仔聲多啲喇，有一份靜俏俏私密傾訴嘅感覺，同陳嘉嘅形象（成日著黑衫）及暗黑音樂底好夾。
2020
形容陳嘉係Art Pop，我認為並非穿鑿附會，佢嘅音樂的確散發住濃濃藝術氣息，由歌曲延伸至MV影像，同樣一脈相承。另一曲《Everyday I Die A Little Bit Inside》，陳嘉發表時更強調，MV唔一定係歌曲嘅襯托，而可以係獨立藝術作品。《Everyday I Die…》MV採用特闊銀幕拍攝，由一名舞者獨舞，同歌詞中心思想「每天心死多一些」有無關聯？定係如陳嘉所講，能夠令我哋「睇得見」音樂，發現更多可能性？
我聽到嘅係，有一個人低迴地唱著、全力地舞著，感覺好孤單，但心底裡，彷佛仍未完全失去所有希望，同悲哀。
2019
《Everyday I Die…》係2017年處女作《Reminiscence》意念嘅後續，為此陳嘉曾將《Reminiscence》重新混音，推出新嘅End Game Version電子版本。咁《Reminiscence》原版又屬於一首點樣嘅歌曲？可以喺陳嘉2年後推出嘅處女E.P.《Shades Of Blue》感受得到。
《Shades Of Blue》結集陳嘉2017年嘅創作，然後用咗2年時間製作。音樂上比而家嘅佢無咁電，相對地Acoustic得多，我會形容為Alternative Folk。而《Reminiscence》就係建基於Alternative Folk上，加入低調結他彈奏，尤其後段嘅Solo，很容易令聽者投入其中，但同時帶著欲言又止嘅餘韻，好有Sad-core嘅沉鬱感染力，我亦好耐無聽過咁出色嘅Sad-core作品喇。
《Shades Of Blue》亦係一場演化論，預告陳嘉從Acoustic走向Electronic嘅轉變。由擁有粒粒精結他、非常清新簡約嘅《Love》做開場曲；緊接嘅《Young》同《Reminiscence》都係比較Acoustic。然後到《Silence》、《Ocean》偏向Electronic，開始奠定日後陳嘉獨有嗰份幽暗電音風格。碟末，更有長達14分鐘嘅《Silence》Soundscape版本，加多一段長達10分鐘嘅Ambient電子前奏 —— 我係咪聽緊Brian Eno？好似好趕客，但留下來聽完14分鐘零8秒的人，你會同我一樣，已成為陳嘉嘅Fans。
其實，好似Art Pop、電子民謠、Alternative Folk、Sad-core……呢啲全部都係形容詞而已，主要希望幫助你認識多一點陳嘉嘅音樂，但最後都要講啱唔啱Feel。由一開始，直到今天，陳嘉嘅音樂，無論電子又好，Acoustic又好，佢仍然貫切一個方向，就係黑暗，同孤獨。就好似行緊一條最漆黑嘅道路回家，沿途上，有時會有人並肩同行，但大部份時間只得你一個人。一個人時候，你會嘗試回頭，望望四周，但都係見唔到任何人。或者因為今晚實在太黑太黑喇，如果多返少少光線，你會發現，呢度仍然有其他人，同你一樣，一齊行緊。
2019年，陳嘉亦同音樂人MAEL合作一曲《Riley And Her Nightmares》，入面第一段歌詞咁樣唱︰「I don't know you / You don't know me / Hey stranger / Would you hold my hand / In these countless sleepless nightmares? 」
