（原文寫於2020年10月8日，現稍作補充，並以此文懷念剛逝世嘅倪匡先生。）
相信唔少人都同我一樣，細細個有追衛斯理系列。後來讀大學時修讀咗科通識，係研究科幻小說同電影嘅，記得教授第一堂講，衛斯理唔屬於科幻，只算奇幻，無知嘅我陡然一言驚醒夢中人，然後啟動獨立思考模式，諗返之前讀過嘅衛斯理小說內容，仲有行文寫法，然後，我就無再睇佢lu。
既然係咁，點解我又會推介衛斯理小說？可能年紀又再大咗，我開始嘗試尋找衛斯理小說一啲出色地方，佢最正嘅係概念（或稱諗頭），幾乎每一本作品都有一個好新穎、好特別嘅Idea；我相信唔少人，包括我自己，間唔使喺腦裡面或夢入面都諗到啲古怪構思想法；但衛斯理同我哋唔同嘅係，佢屬於行動派，佢會將呢啲古怪構思寫落嚟，不斷加啲字上去，然後砌成一篇小說。寫得好唔好？好明顯唔係我呢篇文章嘅分析重點。
咁云云衛斯理小說入面，點解我又會推薦介《命運》？原因好簡單，細個時候，我都有過小說入面差唔多嘅構思想法：我覺得人生只係一場戲，大家都係按住劇本行事，唔同之處係我哋無真係手執著劇本去演譯所謂「人生」咁解。呢一份悲觀主義情緒，亦係衛斯理其中一面嘅中心思想；所以我會比較鍾意《命運》、《背叛》、《規律》呢類作品，多於《藍血人》、《不死藥》、《蜂雲》嗰類奇情曲折派別。
鍾意正統科幻嘅朋友，其實毋需對衛斯理嗤之以鼻，佢嘅創作力量同幻想，其實能啟發大家思考：如果比著我寫，點先可以將啲咁好嘅Idea，寫成正統科幻小說呢？我亦推介比小學同初中生，以及無乜點睇書嘅人，因為真係好易睇，同埋某啲作品的確幾有趣。對我自己嚟講，因為寫呢篇文章而重溫《命運》多一次，睇完之後，我發現，再無好似以前咁鍾意呢本小說lu。不過呢，由衛斯理啟發嘅許冠傑歌曲《宇宙無限》，我仍會不時播放。歌曲嚟自電影《衛斯理傳奇》，故事改編自《天外金球》。電影拍得麻麻，不過呢首主題曲真心經典，由Chyna主腦Donald Ashley作曲編曲、林振強填詞，某程度上，我認為係回應緊《命運》小說入面，我哋每個人嘅「劇本」︰
人在世，有太多私心與紛爭，
似不知一切輕重如毛造的針，
瑣碎像塵。
的確無乜好爭，人生一切都只係按劇本行事，爭咩吖，溝埋嚟做瀨尿牛丸吖笨。不過我相信，創作衛斯理嘅倪匡本尊，就算發現人生就如一盤早已安排好點行嘅棋，佢仍然會喺大路之中嘗試行分叉路，例如佢幫金庸做替工寫武俠小說，真係將兩位才子溝埋嚟做做瀨尿牛丸。而去到最後，當身邊好多人已轉行另一條大路，佢仲係堅持行自己正確嘅路。亦因為咁，成就到佢嘅人生仍然多姿多采，同有風骨。
