起初係因為《蜜蜂與遠雷》嘅主題吸引過去，小說講古典音樂，雖然唔係我熟識同聆聽嘅範疇，但只要係音樂，我都有興趣。
小說以現實中浜松國際鋼琴比賽做背景（書入面改名做芳江國際鋼琴比賽），主要圍繞3名年輕音樂天才，同埋1名全場年紀最大（雖然都係得28歲）嘅追夢爸爸，4人參賽過程同心路歷程。
對我呢啲鍾意寫吓音樂文章嘅人嚟講，一路讀《蜜蜂與遠雷》，一路會好讚嘆，作者恩田陸以佢仔細又細膩嘅筆觸，鉅細無遺形容4位主角同其他參賽者上台演奏嘅片段。從來無睇過一本書可以用咁豐富嘅詞彙同修辭手法，以及各式各樣行文寫法，去形容古典音樂。某程度上，可以話係一本超級厲害嘅樂評文集，好值得我寫文時借鏡參考，同時又自慚形穢，點解自己用詞咁匱乏！
當然，《蜜蜂與遠雷》俾我嘅啟發，絕對唔止咁。小說其實有齊好多日劇嘅正能量元素：為夢想而努力啊、比賽最重要係過程而唔係結果啊、好好運用自己嘅天賦才華啊、重新面對以往種種遺憾……我本人向來唔太buy呢啲正能量內容，但《蜜蜂與遠雷》同日劇喺相同之中卻有一點非常唔同，就係無咗熱血嗰部份。呢點非常重要，令到小說更加貼近現實，就算入面四份之三位主角都係音樂天才，但呢幾位天才除咗彈琴好叻同好鍾意音樂之外，其實同普通人無乜分別。
印象最深刻一幕寫佢哋三人一齊開心行街街，同行朋友靜靜雞墮後，幫佢哋影咗張背影相。呢一幕，我認為係同另外四份之一主角（年輕爸爸）嘅描寫段落相呼應 ── 年輕爸爸一直希望演奏出屬於普通人嘅平民古典音樂，嗰3位天才何嘗唔係？音樂，無論係曲高和寡，還是貼近民氣，係古典係流行係爵士，乜野形式點樣表達，都唔係最重要，最重要係能夠感動到我同你，並且透過美妙嘅音符，將人同人之間連結起來，然後傳播開去。
《蜜蜂與遠雷》，全書近乎沒有起伏嘅故事編排，平情而論娛樂性唔算強，但鍾意音樂或文字嘅朋友，一定體會到小說美妙之處，好多地方都好有餘韻，令人回味同思考，呢方面同音樂非常相似。讀完之後我先知道有電影版，將原著以養蜂少年為主導，改成以小說唯一女主角做焦點，重點係由我幾鍾意嘅《小偷家族》女星松岡茉優演出。電影版都改編得唔錯，但睇完之後，我都係鍾意小說原版，細膩得多。音樂串流平台同時有《蜜蜂與遠雷》音樂集（日本有出實體CD），輯錄小說入面出現嘅古典樂章，非常優美動聽，我認為係好好嘅古典音樂入門專輯。
