（原文刊登喺2003年《mcb》，現版本稍作修改）
舊年曾訪問Chris Ho，嗰時係因為佢化名Tomato，正籌備自己首張個人專輯。估唔到事隔一年多，再有機會訪問呢位本地電子音樂人，不過今次佢嘅身份，係壞碑唇成員。
壞碑唇，香港資深電子樂隊，係1993年Chris喺加拿大讀書時同朋友組成，後嚟回流香港發展。數數手指，赫然發現樂隊已超過十年歷史，所以資深一詞，絕對無用錯。回顧壞碑唇過去音樂歷程，曾推出兩張專輯同零碎EP，並經常出現喺本地同台灣嘅獨立樂隊合輯，產量唔算十分頻繁，但亦唔算十分懶惰。不過自從2000年年尾一張《戀Sing24》E.P.後，已超過兩年無壞碑唇嘅新作了，期間樂隊主腦Chris同少爺占等人組成野仔，亦推出咗Tomato個人專輯。
嚟到今年，壞碑唇第三張專輯《三姑六婆》亦喺最近新鮮上市。再度訪問Chris，佢仍舊係一副熱情幹勁嘅模樣，今次佢身邊仲多咗一位標緻女士，壞碑唇嘅女主音Yvonne Lee，合組成現時樂隊一男一女陣容。
「只會批評」嘅女主音
Yvonne：「我2000年加入壞碑唇。早期Chris都搵過幾位主音，但佢發覺同樂隊歌曲唔係好夾，於是經朋友介紹下識咗我。之前我主要唱Musical，或喺一啲公司、學校場合獻唱，唔算係好Professional嗰種。起初同Chris合作時試唱咗幾首歌，大家都幾滿意出嚟嘅效果，後來便決定正式成為壞碑唇成員。」
熟悉壞碑唇嘅樂迷都知道，樂隊向來以Chris做主腦，由佢「一腳踢」包辦歌曲創作、後期製作同混音等工序，新專輯都唔例外。咁Yvonne負責主唱部份外，喺樂隊入面仲有乜嘢工作呢？
Yvonne：「無！基本上我除咗唱歌，就只有『批評』嘅工作。例如當聽試唱Demo時候，如果覺得唔啱Feel，就叫Chris再改一次；歌詞唔太鍾意又要改……好多時我都會抽離樂隊成員身份，以普通聽眾角度去俾意見，批評多，建設少，哈哈！」
Chris：「但我覺得咁樣嘅合作方式反而更好，因為Yvonne係一個好著重感覺嘅人，相反我本身比較著重理論、技術性方面。例如有時佢唱歌有啲音調偏差咗，我話咁樣好似唔係太好，但佢認為無問題啊，OK啊，通常我都會接受佢睇法。可能正因為呢啲『偏差』，所以先更好聽呢！」
男人講女人
初聽新專輯《三姑六婆》，好明顯已聽到專輯內容經過計算同考慮，意圖從女性身份去睇愛情、生活、青春等事物。音樂上，似乎都為配合內容取材，製作出一張香港少有嘅Chill-Out流行電音唱片。
Yvonne：「因為Chris好憎女人（Chris馬上反駁：我幾時有憎女人？）佢覺得女人好煩、好複雜，於是想做一張唱片去研究！（Chris默認）」
Chris：「因為我唔太擅長填詞，專輯入面除親自寫咗《玩＊一個可愛的人》外，其他歌曲便搵嚟關勁松、文嘉龍、陳錫海等人幫助（呢幾個全部都係男人！），叫佢哋從女性角度去填，題材內容就任意發揮，最後效果都好滿意，例如阿松嘅詞風非常直接，佢填嘅《初夜》，可以話一矢中的！」
Yvonne：「我好怕唱一啲好老土嘅歌詞，譬如乜嘢『在雪中凋謝』、『在咖啡室呆坐』，如果要我唱出嚟，肯定非常唔舒服。不過新專輯內嘅歌，我卻唱得比以往更有Feel！」
Chris：「講到專輯嘅Chill-Out風格，其實係覺得香港過去已有好多人玩過唔同類型嘅電子曲風，例如Electro-Pop、Electro-Rock等，但似乎較少人玩Chill-Out，便諗到不如做一張出嚟試試！」
有責任嘅音樂
記得舊年訪問Chris時，佢曾講到壞碑唇嘅音樂已越見工整同計算，背後有太多包袱、太多責任要顧及。亦因為咁，舊年佢決定製作一張滿足個人創作意欲嘅Tomato專輯。而家重回壞碑唇嘅主腦身份，重拾有包袱、有責任嘅音樂創作形式，其實兩者比較之下，邊樣較好？
Chris：「對樂迷來說，當然係『有責任』嘅音樂較好，要俾聽眾清楚知道你嘅唱片想講啲乜，概念又係啲乜。唱片唔同MP3，聽MP3你只會Download某幾首好聽嘅歌，但聽唱片就要成張去聽。而且做音樂好多時都係『有包袱』比較好，有包袱，先有動力去推動你做比以前更好嘅音樂，唔係嘅話，人就會懶落嚟。」
全程Chill-Out
同屬Chris一人製作，惟相比起Tomato舊年嗰張略嫌風格混雜嘅《Small Tomato In．Big Tomato Out》個人專輯，壞碑唇呢張《三姑六婆》絕對清晰得多。從前聽本地電子音樂，最怕因為器材不足同混音等問題，導致出嚟嘅水準簡陋粗糙。不過Chris經過多年嚟對電子音樂嘅鑽研後，新碟無論喺曲式編排、音色取樣，以至氣氛凝造等各方面都有出色表現，能唔能夠媲美外國水準，唔同人或有唔同意見，但對我嚟講，《三姑六婆》絕對係近年本地足以「擺得上檯」嘅電子專輯。從一而終嘅Chill-Out，懶洋洋嘅風格，同Yvonne漫不經心嘅演繹非常夾，令人聽得非常舒服。
歌詞方面，正如Chris所講，確能寫出現代城市女性嘅心態。用詞也正如Yvonne所講，無陳腔濫調嘅造句，感覺更加寫實，聽起嚟亦更順耳。由阿松執筆嘅兩首《太太離家上班去》《初夜》，前者以生活化描寫，道出主婦嘅空虛，同歌曲本身嘅輕盈風格成有趣對比；後者歌詞單刀直入得嚟又充滿暇想空間，亦好鍾意襯托喺背後嗰啲新浪漫鋼琴彈奏。甜甜蜜蜜嘅《戀愛滋味》擁有唔錯旋律，配合Eletro-Pop式醒神節拍，仲有一段神來之筆嘅Old Synth收尾呢。不過全碟最精采一曲肯定係《鎖不住的青春》，大量Ambient氣氛電子聲效，輕柔到好似飄浮喺天空中嘅音樂；拼湊嘅歌詞旋律，教人捉摸不住。至中段Seassons Lee嘅電結他彈奏一出，令歌曲嘅情感一瀉千里釋放出來……或者再多虛無飄渺嘅讚美都係徒然，但最後我都要Down To Earth讚一句：《鎖不住的青春》係近幾年我聽過最出色嘅廣東歌！
青春不言老
雖然組成已超過十年，不過《三姑六婆》證明壞碑唇 / Chris仍能跟得上大時代音樂步伐，Chris表示新專輯係佢有史以來最滿意一次，但滿意唔代表滿足：「其實由我第一日玩音樂開始，我已有一個好變態嘅想法，就係每次做完一張唱片，我就會唔鍾意佢，因為當中會發現自己有好多不足之處；然後到下一張唱片，又會發現另一啲不足，新專輯都係一樣。但人要咁樣，先能夠進步。」正因為呢種創作音樂態度，令壞碑唇從來唔會令人感覺年老。「玩音樂唔同做偶像歌星，30歲就要退休。你睇Norman Cook、David Bowie、Sting，佢哋越老，玩得越勁。有人認為年紀老就唔適合夾Band，我覺得呢個只係包袱問題，其實真正原因係佢哋放棄咗音樂。」講得無錯，時間、年紀只係數字，只要我哋能投入其中，時間便唔會存在。所以人最大嘅悲哀，就係放棄，放棄一切悲歡哀樂嘅權利。同舊年一樣，我又再羨慕Chris起嚟。
