《MCB》雜誌，係我年輕時候吸收外國音樂知識嘅重要讀本，嗰時正值Britpop大紅年代，電嘢就正值Trip-Hop崛起。本人其時對跳舞音較少涉獵，但有興趣，所以開始留意雜誌入面一位作者叫羔羊，佢清一色只寫dance music，寫得相當唔錯，其中一隻我睇完碟評後跟佢買嘅Mukkaa《Kiss My Acid》，便成為日後影響我音樂口味嘅重要作品。雖然遲咗差唔多三十年，喺度我仍要特別同羔羊講聲多謝。
除咗Britpop同Trip-Hop，當年流行嘅仲有Trance，《Kiss My Acid》算係屬於呢個體系，但正斗在佢喺固有嘅四拍四「殘思」節拍之上，再加入Roland 303嘅Acid聲效，效果出奇地夾，可以稱之為Acid Trance。
《Kiss My Acid》成首歌都充滿玩味十個趣，開場無耐引入模擬「啜啜」效果嘅電子聲效已好頂癮，之後狂loop哈哈笑聲同「Kiss my acid」人聲，聽起嚟似足「Kiss my ass」，估唔到Trance都可以玩語帶相關！再加多段同樣趣趣地嘅仿銅管樂sample，相比之下主角Acid sound嘅焦焦聲唔算好搶，但每條track各司其職，溝埋一齊又非常啱key，越聽越過癮，越聽越啱feel。
豈料，A side嘅《Kiss My Acid》只係小試牛刀，AA side嘅《Madass Goes To Kilmarnock》先係戲肉！呢首可以話係《Kiss My Acid》嘅remix版本，又或變奏版本，個beat由Trance漸漸加快到變Techno，哈哈笑聲笑得更詭異，焦焦聲變得更瘋狂更刺激更痴根，完全將Acid Sound玩到出神入化，令我讚嘆到五體投地！正路形容，係令人fing頭fing到停唔到嘅超正舞曲；正確形容，係將Acid sound同Trance推到去另一個境界嘅神級作品！
究竟嗰個境界係咩？確實好難具體形容，唔關係咪詞窮事，情況就好似一個講嘢好叻嘅人，唔代表佢講嘅嘢一定正確。Sorry呢個比喻唔係幾啱，或者我嘗試借用呢排好hit嘅電影《靈魂奇遇記》嘅百搭寓意嚟解說：你想尋找大海，但其實你一早已喺大海入面。而我發現《Kiss My Acid》原本係天空上嘅雲，化成雨水後滴咗落池塘度，再流入大海變成海水（究竟我寫咗啲乜？）
