緣分呢樣嘢，從來就係咁奇妙。
十八年前，我曾嚟到台北市嘅台大誠品後街、而家已關門大吉嘅「誠品音樂」，遇見甜梅號嘅小白。嗰一晚，我去咗睇甜梅號喺「地下社會」嘅演出。
十八年後今天，我重臨呢度，「誠品音樂」而家已變成一間教會機構。從台大一路走到師大，再嚟到「地下社會」舊址。一路行，心裡面浮現好多「如果」──如果嗰日無同小白喺「誠品音樂」相遇、如果嗰日我去咗另一間唱片舖、如果嗰日小白無喺誠品上班、如果嗰次我無去台北出差……我真係唔知道，後來我會唔會聽到甜梅號，同埋其他台灣獨立樂隊嘅音樂，包括後來我最喜愛嘅草莓救星？
諗住呢一大堆如果，但好苦惱搵唔到答案。The Verve講過「Life is not a rehearsal」，生命唔容許綵排。但緣分呢樣嘢，除咗奇妙之外，仲令我好苦惱。
如果重頭嚟多次，如果我無同甜梅號、草莓救星相遇，我嘅人生會係點？
從台北返港嘅回程航班上，我睇咗Danny Boyle嘅電影《Yesterday》。睇完後，我好似清晰喇。
《Yesterday》嘅男主角，係一位鬱鬱不得志嘅唱作歌手。一次交通意外後，竟發現The Beatles突然喺世界上「消失」，得佢一個仍記得披頭四嘅音樂。佢會點樣做呢？
如果，草莓救星突然喺呢個世界上「消失」，得我一個記得佢哋嘅音樂，我又會點做？
我相信，我會好似男主角一樣，第一時間Google search。「好彩，甜梅號無消失！」然後馬上飛去台北搵小白。
「係咁嘅，我稍後會唱幾首歌出嚟，因為我唔識玩音樂，五音亦不全，國語就更爛，麻煩你幫我將呢啲歌製作成Demo！」我啲國語真係很爛，仲要連珠炮發，小白完全搲爆頭唔知我噏乜。但我唔理咁多喇，「唔好呆咗喺度喇！而家關乎台灣獨立音樂嘅存亡！」
下一步，就係去台中，循東海大學搵腊筆，請佢聽聽呢幾首Demo。
「嘩哈哈，你係女人嚟？唔係點可以將姨媽到描寫得咁絕核！」
「你係煙剷咩，哈哈！」
「呢首唱英文，好正噃！但旋律短咗啲……」
「點解呢首英文歌要用中文歌名？你都去過寂寞小公路？嗰度嘅風聲、蟲鳴……一切一切，對我嚟講充滿回憶，意義重大。我好鍾意呢一首！」
「呢一首只用咗兩個和弦，但好好聽。但係……你呢啲歌，好似女仔唱會更好。」
「你講得無錯，呢堆歌，其實全部係你創作同主唱的！」聽我咁講，腊筆自然係完全搲爆頭唔知我噏乜。
「唔好呆咗喺度喇！我要快啲同你去搵ARNY、啟泰、Dudu佢哋，將呢堆Demo重新玩一次！」
「你都認識佢哋？Dudu？佢去咗做大頭兵喇！」
「唔緊要，我哋搵PK樂團嘅Tony幫忙，佢好重要！仲有DJ Tom、昱人……」
「咪住，你講得太快喇，我跟唔切……你係要我同啟泰佢哋夾Band？點解？」
「我頭先咪講咗，呢啲歌係你創作同主唱嘅，我而家只係將佢哋還俾你！」
「……咁……樂隊叫咩名？」
「問當兵嘅Dudu，叫佢隨便改一個就得！」
「呢堆Demo只得五首，似乎唔夠錄製一張專輯……」
「其實仲有一首，但係純音樂嚟，我唔知點樣表達俾你……係喇，啟泰曾自己一個去東台灣旅行，你就叫佢隨嗰次旅行嘅感覺，寫一首旋律出來啦！」
於是，喺嗰個草莓救星原本被消失嘅平行宇宙中，佢哋又重新復活喇。
You are just on earth dear, to make the numbers up。我清晰喇。我活喺呢個世界，除咗為湊夠數，仲有一啲原因嘅。其中一個，就係要令人知道草莓救星嘅音樂。
草莓救星唔同披頭四，佢哋嘅音樂，唔係世上每一個人都聽過。我另一深愛樂隊Felt，有一張精選專輯叫《Stains on a Decade》，嗰個Stains，我認為唔係貶義詞，而係象徵樂隊化身一抹輕柔色彩，喺時間長河入面留下一道淡淡印記。呢啲印記，唔係好多人發現到，但我清楚睇見佢哋。我希望，更多人能睇見佢哋。好似Felt，好似草莓救星。
閉上我的眼睛，聲音越來越清晰。寫到呢度，又再聽緊《太陽系》呢首我最深愛嘅草莓救星作品。如果你耐心睇到呢度，我誠心推介你用人生入面九分鐘時間，聽一聽呢首作品（若你已聽過，就聽多次啦）。恍似宇宙混沌初開嘅電子前奏，漸漸接入簡單但暖入心嘅電結他彈奏，由腊筆溫柔細語，唱出一幅滿帶憧憬、期待嘅圖畫。從來無諗過，我會鍾意呢一首歌。既然我鍾意呢一首歌，我相信，喺我潛意識入面，亦曾期待過咁美好嘅畫面，有天降臨我身上。
感恩今天，我搵到我嘅太陽系。
感恩草莓救星，你哋令我知道，人活喺世上，係可以有感覺，更可以係有意義嘅。
