（原文刊登喺2002年《mcb》，現版本稍作修改）
呢篇係一篇唔負責任嘅New Face文章。
Corduroy Utd.，嚟自瑞典嘅四人清新樂隊，同以前嗰隊玩Acid Jazz嘅Corduroy完全無關係。Corduroy Utd.同Edson同屬Summersound Recordings廠牌，加上佢哋嘅處女細碟《Behind My Back》亦係由Edson主音歌手Pelle Carlberg監製，大致你都想像得到，Corduroy Utd.玩奏嘅會係乜嘢類型清新音樂。
現階段有關Corduroy Utd.嘅背景資料可以話係完全欠奉，只知道四位成員啱啱過17歲，兩男兩女，負責長笛嘅主音Gustav Ågren，同時係創作主腦。兩位女仔Anna Åkerblom彈結他，Jenny Cullemo負責和音同吹奏Melodica，剩低嗰位男仔，Leo Nathorst-Böös就係低音結他手。
我已差唔多寫晒有關Corduroy Utd.嘅資料介紹。吓？咁短？早話咗呢篇係一篇唔負責任、更係唔夠全面詳盡嘅New Face文章，但我仍堅持寫，因為我好希望俾更多人早啲知道呢隊咁正嘅瑞典新晉樂隊，忍唔住想馬上想你聽到佢哋嘅《Behind My Back》細碟。
玩奏清新音樂嘅樂隊，全世界多的是，Corduroy Utd.有乜優勝之處？答案係，仍未有。不過，喺《Behind My Back》碟入面四首歌曲中，我發現一隊喺各方面仍有待琢磨嘅青澀樂隊，但同時聽到佢哋幾乎包容所有清新音樂元素嘅潛質。動人旋律、真摯歌詞、羞澀主唱、甜美和音、流麗結他、醒神吹號……呢啲固然唔少得，但從音樂散發出嗰份只屬於年輕人嘅大無畏情懷，同埋點點傷感，無靈魂嘅樂隊，係永遠演繹唔到嘅。
我唔會話Corduroy Utd.將會成為乜嘢偉大經典樂隊，世界上璞玉多的是，只係無乜人願意細心發掘。既然係咁，你願意相信喺《Behind My Back》封套裡面，收藏咗一隊能觸動你心靈嘅樂隊嗎？
