識我嘅音樂朋友都知道，我好鍾意八十年代英倫新浪漫 / Synth-pop音樂；我係嗰種聽到叮叮噹噹電子琴音，就會開心得彈起嚟嘅人。不過電子音樂一直被批評為冰冰冷冷，無乜感情。當年嘅我絕不同意，卻一直搵唔到完美例子去反駁。
直到Pet Shop Boys嘅《Behaviour》出現，我搵到喇。
直到今天，我仍認為《Behaviour》係PSB顛峰之作，亦係佢哋最坦白之作。從開場作《Being Boring》到完場曲《Jealousy》，10首作品都擁有動聽旋律，但唔係佢哋以往嗰啲Pop到震嘅大熱細碟曲式。喺動聽易入耳之外，仲多咗一份味道，相信同佢哋用上大量復古Analogue電子樂器有關，仲喺幾首歌曲度加入結他彈奏，感覺突然昇華咗。呢啲就係我一直想搵嘅、充滿人性化感情嘅電子流行曲喇。
寵物店男孩嘅歌詞，一向可讀性極高。《Behaviour》內嘅歌詞，亦係佢哋最坦白一次。坦誠面對自己，從來唔容易。《Being Boring》、《To Face the Truth》、《Nervously》、《The End of the World》、《Jealousy》……今天重聽碟內歌曲，仍然令我好感動。仲有《This Must be the Place I Waited Years to Leave》，講嘅係主音Neil Tennent嘅夢境，返番去年輕時讀嘅學校，準備考試。呢種令人唔開心嘅考試夢，我同佢一樣，成日夢到。
最後，我一定要講講《Only the Wind》，呢兩日反覆聽住佢，令我有一番新體會。歌詞講家暴，施暴者對外宣稱無事。故事最後點收科？
「只係一陣風，
吹起一啲垃圾。
風唔大，樹冧下。
呢度無人喊，
有嘅話，都係之前嘅事啦。
喺屋入面，我哋笑緊，
所有嘢都OK…
…呢度無人匿埋，
喺重門深鎖背後。
呢度無人講大話，
因為我哋唔會再講大話…
…只係一陣風，
點解會令你咁驚訝？
佢突然捲起，
喺你發現前，
已經消失。
我無手震，
我無飲酒，
你一定搞錯喇…
…只係一陣風，
佢哋話情況越嚟越差。
佢帶嚟嘅亂局，
好似咒詛咁纏住我哋。
我神經錯亂，
但一切會完嘅。
我希望能處理到，
我應該點樣做？」
故事最後，嗰陣風其實係暴風，摧毀咗呢個家。故事主人翁最後細細聲講咗句I'm sorry就算數。就咁算數，真係得咩？
