可唔可以用幾句說話，總括自從舊年6月9號以嚟，香港發生嘅事，表達出香港人嗰份堅忍同勇氣，同時不失希望？
我會說，
香港，
還未到對岸。
船上再跌盪，
隨時受到踫撞，
你我要抵抗。
別停、
別退後、
別回望。
呢段嘢，唔係我寫，而係節錄自香港樂隊「粉紅A」作品《香港香港》嘅歌詞。
呢首歌，係粉紅A三年前久休復出、喺Clockenflap音樂節演出時玩奏嘅新作；舊年6月5日，佢地喺Youtube發放正式錄音室版本。幾日之後，就係6月9日。
北角，
再到上環，
無論去哪裡，
我內裡有種渴望。
6月9日，我就係由北角出發。
重頭重認
然後，我重頭開始，用心聽返粉紅A所有作品。然後發現不得了，原來「聽清楚一點，會聽見整個宇宙」！我將樂隊過去20年嘅音樂，濃縮喺幾個月內一次聽盡：我姓陳叫做愛男，性格開朗想法似開放，大樹林，遮掩不住興奮¹，請你坐上我的火箭，我知道好戲會在後頭……感覺的確好痛快，好似一次過睇晒十套咸片，但又唔使擔心谷精上腦、精盡人亡噃，你話幾爽！
對唔住，用咸片嚟比喻粉紅A嘅音樂，無疑嚴重貶低佢哋，我鄭重道歉同收回。咸片只能呈一時之快感，但粉紅A嘅音樂，一直以嚟都努力朝向timeless嘅方向創作。喺波士頓長住嘅結他手Tim，多年嚟同另外三位隊員Hayden、Rodney同Yvette相隔兩地，佢哋由一開始已經要「Long D」夾band寫歌錄歌。咁嘅創作模式，需要嘅時間當然比一般樂隊長；但從另一角度睇，咁都有佢好處－－喺創作同錄音過程中，樂隊眾人隨時會為一句歌詞、一段電結他彈奏而不停搓來搓去，何謂慢工出細貨、去蕪存菁嘅用心製作，就是這樣。
Timeless嘅音樂，其中一個重要條件，就係要音樂人攞個心出嚟創作。
一切來得太快
粉紅A啱啱喺舊年11月推出第四張專輯《為藝術犧牲》，卻同對上一張《她來了》足足相隔十三年，名符其實慢工出細貨。如果係一直以嚟跟開佢哋嘅Fans，自然等到頸都長。不過呢，頭先講過，我係半年前先開始真正成為粉紅A嘅「另類」樂迷，當煲完之前三張專輯、煲到滾瓜爛熟之後，馬上又收到佢哋呢張新作，一切來得太快；相比起其他望穿秋水嘅Fans，我諗我係幸福嘅。
「為藝術犧牲」，以前我聽得最多人講呢句說話，係喺九十年代。每當某位香港女星接拍三級片，佢哋就會話自己「為藝術犧牲」。咁當然，佢哋確係有所「犧牲」嘅，不過肯定唔係為藝術囉。
再講，其實每個人，都可以對犧牲一詞有唔同定義。粉紅A四位成員唔係全職音樂人，但我相信，佢哋咁多年嚟，為咗夾Band、為咗音樂，一定有啲嘢犧牲咗。
我哋自己呢？有無曾經為過啲乜嘢犧牲呢？唔一定要重於泰山，可以係輕於鴻毛。大小、輕重、有形無形，都唔係最重要。
最重要係，你有無試過？
香港嘅年輕人，佢哋試過。
重頭重認粉紅A
《為藝術犧牲》係粉紅A有史以嚟歌曲水準最平均嘅專輯，成張碟無一首歌係明顯凸咗出嚟，或凹咗入去，對我嚟講係一次好舒服嘅聆聽體驗，單係估下某段結他獨奏究竟係Rodney定Tim彈，以及喺歌詞度搵返佢哋嘅signature詞彙同情境（地圖、曲線、平原、甜、校園、坐船、體育堂……），已經係賞心樂事。如果你從未聽過粉紅A，可以由《香港香港》同以下呢首《若世界在明日結束》入手：
只要你係香港人，相信一定會對呢兩首歌歌詞有感覺。想講多少少《若世界在明日結束》，歌詞係粉紅A少數嘅單刀直入，對比起佢地向來愛玩曖昧、隱晦嘅表達手法，今次應該唔會有人聽唔明《若世界》嘅意思嘞啩：
可否今次，放棄上班？
可否今次，你要放膽？
可否今次，只得今次⋯⋯
《如平常渡過每天》係碟入面另一首重要作品，繼承住粉紅A從初出道時已聞到嗰浸青春校園氣息，代表佢哋拒絕長大，亦代表佢哋一直忠於自己，唔會盲目隨波逐流。我認為呢份堅持，係每一個音樂人、藝術家必須擁有嘅情操。音樂上，《如平常》嗰份流暢爽勁同一氣呵成，我認為係樂隊有史以嚟最好嘅Jangle-Pop！大家可以聽下呢首無明顯副歌嘅長青流行曲，平淡之中見獨特，越聽越洗腦！
我愛特別長
粉紅A另一個令我著迷嘅地方，係佢哋唔少歌曲尾段都有長長音樂演奏。通常佢哋嘅歌詞都唔會講明意思，但靠住歌曲末段長長嘅music solo，能為聽者提供一個思考空間，慢慢沉澱、細味返成首歌。佢哋呢方面嘅魅力，往往令我聯想起自己最深愛嘅樂隊Felt。曾經講笑，當粉紅A終於有一首長達9分鐘嘅歌曲，我一定會愛死佢哋！
今次新碟，呢個願望雖然繼續落空，但長5分9秒嘅《雨點滴在我的舌頭上》，卻係感覺最接近一次。當Hayden唱完好意識流嘅旋律歌詞後，餘下2分16秒，就由電結他、低音結他、電子琴相繼交織出一片深邃空間，一路聽住，就讓身體隨音樂游走，令人思潮起伏……感覺真係好似Felt！如果《雨點滴在我的舌頭上》好似Felt嘅《The Stagnant Pool》或《Riding On Equator》一樣有成9分鐘咁長，佢將會成為粉紅A最出色作品，沒有之一！
一韻到底
最後，我想鄭重讚揚多一次粉紅A嘅歌詞。佢哋嘅歌詞，如果真係要深入研究，隨時要寫一篇論文先足夠。今次就簡單只講兩個好表面嘅讚點：
第一，粉紅A多採用一韻到底寫歌詞，喺現今廣東歌界別已成稀有產物。今次新碟，就只有《昨晚夢見無人愛我》同《若世界在明日結束》曾轉韻，其他8首都係一韻到底，歌曲比例上今次係最高。當然無話一定要轉韻或一韻到底先係好，都係按旋律同歌詞內容需要而取捨。不過一韻到底限制更多，能夠喺有限詞彙之中，仍寫出不落俗套兼令人充滿深思遐想嘅內容，粉紅A絕對無出其右！
粵文迴響
第二，今次佢哋明顯用多咗廣東話入詞，包括《晚飯後》、《最好的姿勢》同《若世界在明日結束》，雖然當中嘅廣東話句子唔算好多，但用得流暢順耳，一啲都唔突兀，期待粉紅A日後會有一首全廣東話歌詞作品！
既然唔能夠喺短短一篇文分析粉紅A嘅歌詞（其實係驚誤解佢哋意思，會好樣衰），我嘗試獻醜將《為藝術犧牲》歌詞打散，再重組，嘗試從另一角度去理解佢哋嘅音樂文字世界，同時送俾睇到最後嘅你，以及每一個香港人：
如平常渡過每天，北角，再到上環，街燈穿插太過耀眼。我閉起眼，靜候。看到了，你說最愛自由。從微弱燈光之中取出手帳，遺留在身邊的感覺，細心逐秒去記低。
發過最美的夢，就在你的身邊。曾話過，有你在旁便滿足，錯未能避免，但抱著你，我會說，甚麼東西都可以改變。
望上天，今天竟想起你近況。你進入我眼內，張開口的我在草的中央，預見了未來。直到世界盡頭，快將要出發，別停，別退後，別回望。此刻此際，我這麼想，未來，並不可知道，留待明日分曉²，約好一於煲底裡邊見³！
¹ 「大樹林，遮掩不住興奮」一句出自《香港香港》初期其中一個版本歌詞，係粉紅A成員接受香港電台節目《硬地音樂2018》訪問時透露。
² 「留待明日分曉」其實係粉紅A早期作品《不日公映》副歌一句歌詞，而非出自《為藝術犧牲》任何一首歌曲。
³ 「約好一於煲底裡邊見」其實係本人將《如平常渡過每天》其中一句歌詞稍作修改嘅變奏，原文歌詞係「約好一於班房裡邊見」。
