我對9m88嘅印象，源於一首《Aim High》，將R&B同Jazz完美通婚，慵懶地唱出我唔完美，但我志向比天高。2019年佢嘅處女專輯《平庸之上》就係《Aim High》延伸，音樂上加入Hip-Hop元素，復古中見新潮，係帶起近年華語R&B / Jazz-Pop Revival重要作品之一。9m88亦憑此碟一炮而紅，獲得金音獎最佳新人。
9m88嘅時髦，亦源自佢不停跟唔同音樂人Crossover，令樂迷對佢保持新鮮感；《平庸之上》本身已有多首Featuring歌曲；專輯以外亦出過唔少細碟作，個人好鍾意佢同糯米糰主腦馬念先合作嘅《你朝我的方向走來》，熱鬧Big Band爵士風格，配上一個懷舊得徹底嘅MV，彷如馬尿舊年個人專輯嘅2019年預演。今年年初，9m88同香港樂隊R.O.O.T合作嘅《Wanna Be Like You》，濃濃嘅迷離／迷幻Trippy電子，98m88初唱廣東話咬字十分準繩，更唱得騷靈入骨，搶去R.O.O.T主音Jan Curious（阿水）唔少風頭。
上月，9m88推出第二張個人專輯《9m88 Radio》，單睇碟名，再加上一如以往邀請唔少來自世界各地嘅音樂人參與，相信大家已大概估得到，碟內作品就好似聽收音機節目咁繽紛多元化，進一步呈現佢嘅音樂個性同情感，簡單講，就係更成熟，亦更得心應手。呢方面「音樂研究所」 @28music.journal 早前寫咗一篇詳細樂評，大家可睇睇，作為聆聽專輯嘅導讀。
新碟碟名，亦同9m88嘅復古形象好相襯；收音機係上世紀風行嘅娛樂產物，係嗰陣時嘅樂迷接觸唔同歌曲、唔同音樂種類嘅主要途徑；但對更多人嚟講，收音機更有慰藉心靈嘅奇妙作用。之前睇台灣電影《消失的情人節》，收音機就成為片中重要元素，亦成為女主角傾訴心情、憧憬愛情嘅寄託。
用呢個角度聆聽《9m88 Radio》，或者，會再有另一層體會。兩首主打作《Whatchu Gonna...?》與《Love Is So Cruel》都係談及人類最容易傷痛嘅失戀，好比昔日香港好受歡迎嘅白姐姐電台節目《盡訴心中情》，聽眾爭住Call-in，傾訴佢哋各自嘅故事、種種失去／得不到嘅愛情，帶出質疑、疲倦、傷心欲絕，然後勇敢面對嘅心情。明亮嘅《Friend Zone》就係另一端，講緊歌者／聽眾對心儀嘅人嘅一份曖昧同期待。
《Tell Me》一曲，9m88化身成白姐姐／《消失的情人節》嘅馬賽克DJ，用溫婉聲線，輕輕地問身邊正困惱著、找不著方向嘅朋友︰「So tell me, tell me, baby / What really matters to you?」《A Merry Feeling》歌如其名，洋溢住懶洋洋嘅愉快好心情，尾段更加入經典兒歌《Twinkle Twinkle Little Star》旋律伴奏。歌詞係《Tell Me》延續，9m88話俾大家知，同身邊人並肩同行嘅意義所在︰「When you feeling high or feeling low / Feeling hot or feeling cold / I'm with you / Never too late to tell me what you feel……」
碟末兩首《Dark Night / Sunlight》及《Star》，應該係專輯嘅中心思想作品。《Dark Night / Sunlight》開首同樣加入《Twinkle Twinkle Little Star》旋律，呼應住《A Merry Feeling》。歌詞以黑夜比喻傷痛，音樂亦充滿神傷；但9m88提醒我哋必須向前行，先能夠走出傷痛︰「Sing me a song in this dark night / 把所有的痛全都看穿 / Sing me a song under sunlight / 把淚痕曬乾 我會勇敢」。所以佢寫咗呢首歌，以及《Star》，喺黑夜中唱俾大家聽。我哋每個人都係一閃一閃小星星，一顆一顆亮晶晶，Fly through the bitter end，高高掛在天空上，Sky to galaxy，You can fly with me，Ain't no boundary for you……
舊年，9m88發表過一張《This Temporary Ensemble》E.P.，以純爵士形式翻玩《平庸之上》幾首舊作。希望9m88之後會推出Part 2，同樣將今次新碟作品變成100% Jazz，更適合喺夜闌人靜中，一個人聆聽。我嘅心水改編曲目係《Tell Me》、《A Merry Feeling》、《Dark Night / Sunlight》和《Star》。生活喺荒謬而不講理嘅年代，好需要有人話我知，就算呢度有幾黑暗、睇唔見光明，我哋仍然可以做一粒粒星星，綻放我哋可以擁有嘅光芒。
《9m88 Radio》（2022）
