每到年尾，Spotify / Apple Music 等串流音樂平台，都會為訂閱會員統計過去一年聽得最多嘅音樂人 / 專輯 / 歌曲名單。如果問你，你人生中聽得最多嘅音樂人 / 專輯 / 歌曲，又係哪一位 / 那一張 / 那一首呢？
我自己人生中聽得最多嘅專輯，一定是草莓救星嘅《太陽系》。
2002年年尾，草莓救星《太陽系》，經由當年台灣著名獨立音樂廠牌水晶唱片發行。今年剛好係專輯面世20周年，我係咪要寫篇文章，以示紀念？
20年嚟，我的確從無間斷聆聽《太陽系》。由當日嘅CD，到MP3，再到今天串流平台。早年更害怕播CD播太多次會整花隻碟，自行燒製CDR放喺Discman「粗聽」。
一切由2022年11月前往台北聖界Live House、睇美國後搖滾樂隊Explosions In The Sky現場演出而開始，草莓救星為「天空爆炸」暖場。嗰一日，我曾經同樂隊主音腊筆傾偈，佢話佢哋稍後會出碟。
當日Explosions In The Sky嘅Live係日場，睇完之後離開位處地庫嘅聖界，回到地面時候，天空仍然好明亮，感覺好夢幻。嗰日之後，我記住草莓救星呢個名字；返香港之後，發現佢哋開設咗官網，上載咗《自在》同《太陽系》兩首作品試聽版，好聽到不得了。同名專輯《太陽系》趕及喺2002年年尾推出，但香港買唔到；我要待2003年初託友人去台灣時幫我買一隻返嚟。然後，我便從無間斷聆聽住佢，直至今天都係。
應該咁講，《太陽系》已植入我腦入面。記得有一次去東京旅行，東京街頭就同香港一樣人來人往。我開著Discman、戴上Earphone，由專輯第一首《尖嘴》到最後《寂寞小公路》，不斷循環播放著。街上嘅人不停喺身邊穿插，而草莓嘅音樂，已流進我身體內，隨我一齊漫無目的向前行。
「我不自在，這種感覺你們男人怎麼會明白？」明明係同一句歌詞，明明我已聽過無數次，但每一次，當我再聽到腊筆唱著《自在》副歌時，仍會不期然發出會心微笑；有時更索性笑出嚟、唱出嚟，其他人見到，仲以為我發花癲。嚟到新宿一家唱片店，同老闆傾得興起，我介紹草莓救星俾佢聽，佢都覺得好正，索性送埋隻碟俾佢。
成為草莓歌迷後，不時同腊筆及結他手啟泰電郵通信。我曾好奇《寂寞小公路》點解係中文歌名但唱英文歌詞？腊筆同我講，真係有一個地方叫寂寞小公路，喺台中。「《寂寞小公路》前面的蟲鳴、風聲跟吉他、Vocal，也是到寂寞小公路同步收音。」後來，我真係按腊筆教我嘅方法，去咗寂寞小公路。
也許直到今日，我仍然唔明白當日我點解一定要去寂寞小公路，嗰度對腊筆、啟泰、ARNY等意義重大，但對我沒有。但我清楚記得，2003年12月6日，我嚟到台北The Wall Livehouse，睇草莓救星暫別演出（好似因為ARNY、啟泰等要去當兵）。當晚開場嘉賓，無記錯係香港嘅Seasons Lee。
嚟到最後一首歌，腊筆輕掃結他和弦一下，然後唱著：「那個女孩從遠方走來，腳步有點奇怪，看不清楚她的臉上是幸福，還是無奈？」我當然永遠唔會明白女人月經來潮時嘅感受，但每次聽到《自在》呢首歌，我仍然可以自由自在跟隨腊筆唱著。然後完場時好似小Fans咁戰戰競競拿著《太陽系》唱片俾腊筆簽名，同佢握手。
呢一切一切，好似尋日發生咁。嚟到20年後今天，我仍十分珍惜「我鍾意草莓救星」呢份感覺。佢哋後嚟再推出過兩張專輯，同樣十分精彩；又曾經同另一隊我非常鍾意嘅甜梅號合作一曲《這樣的我》，係後搖滾史上嘅Masterpiece。不過，《太陽系》對我嚟講仍然係獨一無二，意義重大。
記得當年《mcb》有一個專欄「一張影響你畢生的專輯」。如果要揀一張影響我畢生嘅專輯，唔准諗即刻答，我會毫不猶疑選草莓救星嘅《太陽系》。原因係……？直到今日，我仍然唔係咁清楚，所以我整咗一個「草莓救星歌迷網站」，以及寫咗呢篇文章出嚟。
