最近從老頭唱片行嘅Facebook帖子，睇到《IS #2》呢張20多年前嘅經典台灣音樂人合輯，腦裡慢慢回想起年輕時聆聽台灣音樂嘅美好歲月。除咗Indie Band，亦有好幾位寶島主流音樂人，我係非常非常喜歡嘅。
黃韻玲（Kay Huang），就係其中一位。
記得當年之所以買《IS #2》，全因碟內收錄Kay一曲《Arthur》—— 那時候，每逢見到「黃韻玲」三個字，無論係乜嘢專輯合輯演奏專輯，我都會毫不猶豫購買收藏。
時間再退後，回到30多年前，家中卡式機傳來一把溫柔女聲「BA BA BA BA」地唱著，音樂非常輕盈，帶點點隨意，係我以前未聽過嘅類型，卻不自覺投入跟住唱。
呢首歌，就係黃韻玲嘅《關不掉的收音機》，亦係我第一次聽佢嘅歌曲。後來我先知道，呢種音樂叫Jazz。
唔平凡嘅《平凡》
《關不掉的收音機》收錄喺黃韻玲第5張專輯《平凡》內，1991年出版，家中嗰餅卡式帶係家姐買嘅。1991年嘅我，鍾意聽達明一派、浮世繪、Depeche Mode、Everything But The Girl之餘，仲會趁家姐唔喺屋企時候，偷偷攞佢買嘅《平凡》放喺卡式機播放。
《平凡》入面嘅歌曲，同我之前喺收音機聽過嘅台灣主流流行曲有啲唔同。《關不掉的收音機》固然係，仲有慢歌《三個人的晚餐》、《聽一首傷心的歌》，感覺無咁激情肉緊，就算係傷感，都係嚟得淡淡然。亦好鍾意《事情本來就是這樣》呢首好有詩意嘅短歌 —— 歌詞正正係來自作家鍾曉陽一首詩。但最深刻係《笑話》一曲，無論曲詞編唱，都極力抑壓著歌者背後嘅傷感：「而我，只能說笑話給你聽／而我，只能一個人傷心」。
Kay & EBTG
後來，我先知道《平凡》係黃韻玲音樂旅程上嘅轉捩點。之前佢喺滾石旗下推出過4張大碟，音樂同形象主要走日系偶像路線；當然，早期嘅Kay已包辦大部份曲詞創作，稱得上係偶像派唱作歌手。但要嚟到《平凡》，先感受到佢音樂上真正自主。專輯改由滾石及Kay創立嘅「友善的狗」聯合發行，更遠赴洛杉磯錄音，找嚟當地知名樂手伴奏，為嘅係捕捉嗰份Fusion Jazz / Smooth Jazz感覺。
嗰時候，總覺得《平凡》不太平凡之外，仲有一份熟悉。後嚟我發現，《平凡》同我1年前買嘅Everything But The Girl《The Language Of Life》專輯好相近，同樣爵士優皮，同樣優雅動人。原來呢兩張專輯亦有喺洛杉磯Sunset Sound同Bill Schnee Studios錄音室錄音，唔怪之得啦。
3張友善的狗經典
《平凡》，加上繼後嘅《做我的朋友》及《黃韻玲的黃韻玲》，係我最喜愛嘅3張Kay嘅專輯，亦係佢將自己嘅Jazz-Pop／Bossa Nova／Sophisti-Pop底蘊推向最極致表現。當年我聽到滾瓜爛熟，更自製精選Cassette將3碟歌曲重新編排次序聆聽。《月光游泳池》、《動物園》及《有時候懶一點反而好》嘅熱鬧繽紛；《做我的朋友》、《喜歡你現在的樣子》同《明天的太陽》嘅醒神正能量，出嚟嘅感覺毫不造作，令負能量嘅人聽完之後，都有機會抖擻精神。尤其鍾意《做我的朋友》加入當年大熱嘅World Music元素，以及《喜歡你現在的樣子》MV結尾Kay一段致敬差利嘅舞姿。
當然，我更唔可以唔提《星期六的音樂會》那完完全全嘅爵士演出，以Double Bass為主導貫穿全曲，然後聽著Kay結尾唱：「他彈Bass，穿著單色的衣服／聲音像從很遠的山谷，傳到心靈的深處／他不愛說話／只喜歡用音樂表達」。呢首歌，其實係Kay本人夫子自道。
我一直好鍾意將《我是壞的》同《會過去的》連著一齊聽，總覺得後者係前者下集。或者再加埋《改變》—— 呢首本來係黃韻玲早期作品，後來以Live版本收錄喺《做我的朋友》專輯內，係一首寫得好Sad好Sad嘅慘情歌。最後我會播放《黃韻玲的黃韻玲》專輯完場曲《出發》，為我當年呢餅自製黃韻玲精選Cassette完美作結。
重溫過去 重回現在
就係呢3張專輯，我迷上黃韻玲。此後無論係乜嘢專輯合輯演奏專輯，只要有佢出現，我都會毫不猶豫購買。Kay嘅純音樂精選《彩色季節》，以及佢同洪筠惠、黃嘉千嘅《四手聯彈》鋼琴合輯，往後成為我工作中最佳BGM選擇。仲有一張《巴結音樂》精選碟，開宗名義輯錄Kay過往嘅Jazz／Bossa Nova作品，令我知道佢早期作品《奶油早餐》同《紫貝殼》，已種下日後嘅音樂取向根源。亦驅使我逐一聽返Kay出道時專輯，原來處女碟《憂傷男孩》內一曲《下午茶》都好有Swing Jazz風格，更驚喜係仲有廣東話讀白呢！
老實講，要寫黃韻玲嘅音樂，真係寫一萬字都寫唔完。自80年代開始，她已為無數主流歌手寫歌及編曲，直至今天仍然係，最新作品係李心潔嘅《親愛的，我想妳了》。她亦為多齣電影／電視劇／舞台劇擔任配樂，最出名應該係張艾嘉電影《心動》。後嚟Kay擔任《超級星光大道》評判，獲封「小玲老師」稱號。我認為，佢係台灣僅有兩位女音樂人，真正稱得上係老師（另一位係李欣芸）。
2010年，小玲老師發表10多年來首張專輯《美好歲月》，點題曲《美好歲月》彷如《出發》續篇，當出發到另一個新的地方後，總要學習面對孤單的自己，繼續我的旅程。下一站有多遠，晴天雨天或遇見誰，沒有答案。正如我無諗過，小玲老師竟會同我最愛樂隊草莓救星分支NyLas合作玩過Live！好想嗰陣時能身處台灣，睇佢同腊筆合唱《喜歡你現在的樣子》、《出發》同NyLas嘅《Love For Free》！
小玲老師繼後嘅音樂旅程繼續精彩，推出過《永恆．承諾》、《初熟之物》、《春暖花開》等作品，以及跨界別藝術專輯《祈禱》等等。然後喺2020年疫情期間，開始擔任台北流行音樂中心董事長；巧合係李欣芸亦當上高雄流行音樂中心執行長，兩位音樂老師一南一北，繼續努力推動台灣流行音樂發展。
2023，繼續出發
時間返番嚟2023年今天，現今嘅流行音樂模式，已同我30多年前聆聽小玲老師時好唔同。收音機已式微，關不掉的收音機要講做關不掉的Spotify；卡式帶式微後，近年又再Revival。我自製嘅小玲老師精選，亦由Cassette、CDR、MP3，變成今天嘅串流平台Playlist。2023年今天，好多好多事情，30多年前我係完全想像不到。從來無諗過，世界會變成今天這樣。未來會點？更加唔敢去諗。
2018年，台灣女歌手孟耿如翻唱小玲老師嘅《出發》，由老師親自擔任監製。《出發》係我最喜愛嘅黃韻玲歌曲。喺新版嘅紀錄片版MV中，小玲老師提及當年寫《出發》時候，正值事業同結婚之間做抉擇，最後她揀咗後者。小玲老師亦提到，人生中總會遇到好多好多唔同嘅挑戰同未知；而音樂，總能夠令佢尋回自己嘅初心。「有風有雨的路前面還有，要怎麼選擇屬於我的生活？站在原地不動？或著嘆息年華易老？」縱有迷茫，縱有不安，傷心過後，仍能抖擻精神，繼續走下去。「該面對的總要坦然的去面對，不該是我的終究還是要讓他自由」。呢一首歌，呢一份信念，就係我最喜歡嘅黃韻玲嘅樣子。
